Eitthvað virðast Valencia vera að slaka á kló sinni á toppi ACB deildarinnar á Spáni á lokasprettinum en í dag töpuðu þeir nokkuð óvænt gegn liði Murcia og hafa nú Real Madrid jafnað Valencia að stigum og deila liðin öðru sætinu. Sem fyrr eru það Barcelona sem tróna á toppnum , tveimur sigrum fyrir ofan og eiga leik til góða.
Allt leit þetta nokkuð vel út hjá Valencia í dag og leiddu þeir í hálfleik með 9 stigum þegar farið var til búningsherbergja í hálfleik. En í seinni hálfleik virtist aðeins annað liðið mæta til leiks. Leikur Valencia gersamlega hrundi til grunna, áttu engin svör og hittu illa og þurftu að lokum að játa sig sigraða, 80:62.
Jón Arnór Stefánsson spilaði sínar 15 mínútur í leiknum og skoraði 3 stig, hitti úr einu af þremur þriggja stiga skotum sínum og sendi eina stoðsendingu.
