Ísland lagði Holland í einkennilegum leik í undankeppni HM 2023 í Ólafssal í kvöld, 67-66. Íslenska liðið lenti mest 16 stigum undir en náðu að sækja sigurinn á lokamínútunum. Fyrir leik voru Ísland, Ítalía og Holland öll tryggð áfram úr H-riðlinum hvernig sem leikirnir færu, enda hefur Rússlandi, fjórða liðinu í riðlinum, verið meinað að taka frekari þátt í undankeppninni sökum innrásar Rússlands í Úkraínu. Sigurinn setur Ísland tímabundið í efsta sætið í riðlinum. Ísland er komið áfram með þrjá sigra í fjórum leikjum og á því enn góða möguleika á að komast á HM 2023.
Karfan spjallaði við Tryggva Snæ Hlinason eftir leikinn. Tryggvi Snær var öflugur fyrir Ísland í kvöld, skilaði 20 stigum, 11 fráköstum og þá bætti hann við 3 vörðum skotum. Önnur góð frammistaða hjá honum í Ólafssal í þessari undankeppni.
