Toronto Raptors lögðu Golden State Warriors rétt í þessu með fjórum stigum, 114 gegn 110 í sjötta leik liðanna um NBA meistaratitilinn.
Leikurinn sá fjórði sem Raptors vinna og hafa þeir því sigur í einvíginu, 4-2 og eru NBA meistarar árið 2019.
Leikur næturinnar var jafn og spennandi nánast allan tímann, þar sem liðin skiptust á að hafa forystuna. Raptors leiddu með stigi eftir fyrsta leikhluta, þremur í hálfleik, en fyrir lokaleikhlutann voru þar Warriors sem voru komnir þremur stigum yfir.
Stigahæstur fyrir Warriors í leiknum var Klay Thompson með 30 stig, en hann þurfti að yfirgefa leikinn eftir 32 mínútna leik sökum meiðsla. Fyrir meistara Raptors var það Kyle Lowry sem var atkvæðamestur með 26 stig og 10 stoðsendingar.
Titillinn sá fyrsti sem Kanadaliðið vinnur og sá fyrsti sem lið utan Bandaríkjanna vinnur í NBA deildinni.
