Thunder, Pacers og Spurs í 2-0 forystu

Þrír leikir fóru fram í úrslitakeppni NBA deildarinnar í nótt þar sem Oklahoma, Indiana og San Antonio Spurs tóku öll 2-0 forystu í rimmum sínum. Um spennuslag var að ræða þegar James Harden mætti öðru sinni á sinn gamla heimavöll í Oklahoma.

 

Harden fór mikinn gegn Oklahoma með 36 stig, 11 fráköst og 6 stoðsendingar… já „fear the beard.“ Þeir Kevin Durant og Russell Westbrook voru svo báðir með 29 stig í liði Oklahoma.

 

Paul George var stigahæstur í liði Indiana með 27 stig og 8 fráköst en hjá Atlanta var Devin Harris stigahæstur með 17 stig, 4 fráköst og 4 stoðsendingar.

 

Tony Parker átti góðan dag í liði Spurs með 28 stig, 4 fráköst og 7 stoðsendingar. Steve Blake og Dwight Howard voru svo báðir með 16 stig í liði Lakers og Howard auk þess með 9 fráköst og 4 varin skot.