Úrvalsdeildarlið hafa fengið bágt fyrir að gleyma búningum sínum heimavið þegar haldið er til Ísafjarðar að keppa. Ísfirðingar hafa tvívegis þetta tímabil þurft að lána búninga sína til gestkomandi liða svo tekið hefur verið eftir.
Í síðustu umferð Domino´s deildar karla var komið að Ísfirðingum að gleyma sínum búningum heima og þá voru góð ráð dýr. Verandi höfðingjar miklir að vestan voru þeir ekki lengi að finna bandamann í borginni þegar Borce Ilievski þjálfari Breiðabliks kom aðvífandi með búningasett. Lék KFÍ í grænum búningum Blika í DHL Höllinni þar sem KR hafði á endanum sigur.
Já, svo bregðast krosstré sem önnur tré.
Mynd/ Sport.is – Blikabúningurinn hefur ekki sést á fjölum DHL-Hallarinnar um nokkra hríð enda leikur liðið í 1. deild.
