Stephen A. Smith er kjáni sem tjáir sig um bandarískar íþróttir á ESPN sjónvarpsstöðinni. Fátt er honum óviðkomandi og er honum sérstaklega annt um New York Knicks liðið.
Í sumar völdu Knicks Lettann Kristaps Porzingis með 4. valrétti nýliðavalsins í ár. Púað var í stúkunni í Barclays Center og óánægja margra þekktra Knicks flæddi inn á vefmiðla og samfélagsmiðla. Fyrrnefndur Smith fór hamförum í langri einræðu á ESPN þar sem hann hreitti skömmum og fúkyrðum í Porzingis, Phil Jackson og alla sem tengjast Knicks félaginu. Einræða hans virtist byggð á ítarlegri greiningu á leikmanninum. Lettinn væri óreyndur, ungur og ekki tilbúinn í NBA deildina þó hann búi yfir einhverjum hæfileikum.
Annað hefur hins vegar komið upp á daginn. Porzingis hefur staðið upp úr í þessum árgangi nýliða og glætt Knicks liðið nýju lífi. Smith hefur einnig viðurkennt nú að hafa aldrei séð manninn spila áður en hann ákvað að drulla yfir hann í sjónvarpi.
Horfið á hann. Hlustið á hann. Hlægið að honum. En umfram allt, ekki taka þennan mann alvarlega.
