Undir 18 ára lið Íslands lagði Austurríki í framlengdum leik með minnsta mun mögulegum, 89-88, í öðrum leik sínum á Evrópumótinu í Ploiesti í Rúmeníu. Liðið hefur því unnið einn og tapað einum þegar fyrstu tveir leikir riðlakeppninnar eru að baki.
Segja má að liðin hafi skipst á áhlaupum í leik dagsins þar sem Austurríki leiddi bróðurpart fyrri hálfleiks, en í seinni hálfleik var það Ísland sem var með ágætis stjórn á leiknum. Líkt og tölurnar gefa til kynna var leikurinn þó hnífjafn undir lokin og þurfti því að framlengja að lokum venjulegt leiktíma í stöðunni 76-76. Undir lok framlengingarinnar var það þristur frá Báru Björk Óladóttur sem innsiglaði sigurinn fyrir Ísland þegar rétt rúm mínúta var til leiksloka. Með honum komst Ísland í stöðuna 89-82 og var það hreinlega of mikið fyrir Austurríki til þess að vinna niður á svo stuttum tíma.
Atkvæðamest fyrir Ísland í leiknum var Kolbrún María Ármannsdóttir með 25 stig, 14 fráköst og 5 stolna bolta. Þá skilaði Anna María Magnúsdóttir 20 stigum, 5 fráköstum, 4 stoðsendingum og Fjóla Gerður Gunnarsdóttir 13 stigum og 9 fráköstum.
Íslenska liðið fær nú tveggja daga frí og á leik næst komandi miðvikudag 7. ágúst gegn Tékklandi.
Hér fyrir neðan er hægt að sjá upptöku af leiknum, en aftast í henni eru æsispennandi lokamínúturnar.
