Tindastóll hefur samið við Omoul Sarr um að leika með liðinu á komandi tímabili í Bónusdeild kvenna.
Omoul er 40 ára 190 cm senegalskur/spænskur framherji/miðherji sem kemur til Tindastóls frá Freseras í Mexíkó, en þá hefur hún einnig áður leikið fyrir félög á Spáni, Ekvador, Frakklandi, Belgíu, Póllandi og Tyrklandi. Hún hefur einnig verið landsliðsmaður Senegal til margra ára, en síðustu leikir hennar fyrir þjóð voru fyrr á þessu ári.
“Sarr hefur gríðarlega reynslu af því að spila í efstu deildum í Evrópu og um allan heim. Hún er góð fyrirmynd sem íþróttamaður og hugsar vel um líkamann sem gerir henni kleift að vera enn að spila keppnisbolta. Hún er leiðtogi innan vallar sem utan. Ég er mjög ánægður að hafa fengið hana í Tindastól. Hún er sterkur leikmaður sem stígur upp í stórleikjum og þegar liðið þarf mest á henni að halda.” segir Israel Martin þjálfari liðsins.
Sarr segist ánægð og spennt fyrir tækifærinu til að spila á Íslandi. “Ég hlakka mikið til að koma á Sauðárkrók, kynnast liðsfélögum mínum, klúbbnum og bænum. Ég hef talað við Martin þjálfara og mér líst mjög vel á markmið hans og allra sem koma að körfuboltanum. Ég hef aldrei komið til Íslands en ég veit að það er fallegt og kalt svo ég hlakka mikið til að takast á við nýjar áskoranir og læra eitthvað nýtt”
Dagur Þór, formaður segir Tindastól vera stórveldi í íslenskum körfubolta með mikinn metnað fyrir því að styrkja kvennaliðið til framtíðar. “Stelpurnar okkar þurfa öflugar fyrirmyndir og Sarr hefur mikla þekkingu og reynslu sem hún getur miðlað til stelpnanna okkar. Það er því einkar ánægjulegt að fá hana til klúbbsins.”
