Fréttir gærdagsins varðandi frekara bann á æfingum og keppni í körfubolta fóru illa ofaní marga þeirra sem iðka íþróttina og áhangenda hennar. Margir tjáðu reiði sína á ákvörðuninni samfélagsmiðlum þar sem allt fékk að flakka. Líklegast hefur enginn þeirra þó farið í jafn harðar aðgerðir og bakvörður Vals og íslenska landsliðsins Pavel Ermolinski, en í ljósi fréttanna ákvað hann að hefja hungurverkfall.
Samkvæmt honum mun verkfallið hafa hafist kl. 22:00 í gær og mun það aðeins geta endað á tvo vegu. Annaðhvort fær hann að æfa aftur, eða deyr úr hungri.
Engar frekari fréttir hafa komið af verkfalli leikmannsins knáa. Samkvæmt uppfærslu hans mun síðasta máltíðin hans hafa verið samloka, en ekki er tekið fram hverskonar samloku hafi verið um að ræða.
