Valur tekur á móti Tindastól kl. 19:15 í kvöld í oddaleik um Íslandsmeistaratitilin. Það sem af er einvígi liðanna hafa þau skipst á að vinna útileikina, þannig að Valur hefur í tvígang unnið í Síkinu og Tindastóll hefur unnið báða leiki sína í Origo Höllinni.
Á síðasta ári þurfti einnig oddaleik til þess að skera úr um hvort þessara liða myndi hampa Íslandsmeistaratitlinum, en þá var það Valur sem vann eftir að hafa verið sterkari á lokasprettinum, 73-60.
Karfan hafði samband við Brynjar Þór Björnsson sérfræðing úr Körfuboltakvöldi og margfaldan Íslandsmeistara með KR og spurði hann út í einvígið og hvernig hann sér leik kvöldsins spilast.
Hvernig finnst þér einvígið hafa spilast, við hverju er að búast í þessum oddaleik?
“Við eigum enn eftir að fá leik sem bæði lið eiga möguleika á að klára á síðustu mínútunum. Hingað til hefur annað liðið klárað leikina frekar þægilega og án þessarar gríðarlegu spennu sem einkenndi seríuna í fyrra. Mér finnst gaman að sjá hversu mikilvægur Frank Booker hefur verið Völsurum í sigurleikjunum þeirra, hann gefur Kára og Pablo mikið pláss til að vinna með Kristó, leikmaður sem margir voru búnir að afskrifa.”
“Í oddaleikjum er skemmtilegast að fylgjast með hver af aukaleikurunum stígur upp. Við sáum Hjálmar eiga frábæran oddaleik í fyrra og gera gæfumuninn fyrir lið Vals.“
Hvernig fer leikurinn?
“Ég spáði Tindastóli sigri í þessari seríu og ég verð að standa við mína spá. Pétur Rúnar mun eiga stórleik og sjá til þess að bikarinn fer í fyrsta skipti norður yfir heiðar.”
