13:41
{mosimage}
(Smith þótti ekki standa fyrir sínu)
Körfuknattleikslið Hauka í Iceland Express deild karla á von á nýjum bandarískum leikmanni til liðsins. Sá heitir Wayne Arnold og mun fylla skarð Kevin Smith sem látinn var fara frá félaginu. Þá mun serbinn Predrag Novakovic ganga í raðir Hauka snemma á nýja árinu.
Gengi Hauka í deildinni hefur ekki verið sem skyldi og er liðið í 11. sæti deildarinnar. Þó skammt sé í sæti í úrslitakeppninni telur Hjörtur Harðarson, þjálfari liðsins, að styrkja þurfi hópinn fyrir komandi átök. „Smith þótti ekki nægilega stöðugur, það voru miklar sveiflur í hans leik og við máttum illa við því. Við þurfum að fá meira framlag á hverjum degi frá atvinnumanni. Haukaliðið ætlar sér í úrslitakeppnina og ég veit að það býr meira í strákunum en þeir hafa verið að sýna undanfarið,“ sagði Hjörtur í samtali við Karfan.is.
Kevin Smith var með 19,8 stig að meðaltali í leik fyrir Hauka en nýji leikmaðurinn, Arnold, kemur frá East Tennesee State háskólanum í Bandaríkjunum og var þar með 13,9 stig að meðaltali í leik á sínu síðasta ári.
Næsti leikur Hauka er þann 4. janúar þegar þeir heimsækja Tindastól á Sauðárkrók.
