Mikael Máni Möller, Guðjón Logi Sigfússon og Kristofer Mikael Hearn hafa allir þrír samið við Njarðvík fyrir komandi leiktíð í Bónusdeild karla.
Allir eru leikmennirnir uppaldir Njarðvíkingar og við það að stíga sín fyrstu skref með meistaraflokki félagsins, en þeir munu einnig leika fyrir ungmennaflokk þeirra á næstu leiktíð.
„Það er mikilvægt að vera með stóran og góðan æfingahóp í meistaraflokki sem og sterkan ungmennaflokk en allir þessir piltar munu fá að spreyta sig á báðum vígstöðum. Við erum með fjölmennan hóp ungra leikmanna sem munu í vetur og á næstu árum gera sterkt tilkall í að komast í Njarðvíkurbúninginn,” sagði Rúnar Ingi Erlingsson þjálfari meistaraflokks karla og Halldór Karlsson formaður Körfuknattleiksdeildar Njarðvíkur tók í ekki ósvipaðan streng „Bæði ég og Rúnar þekkjum það sjálfir sem fyrrum leikmenn hversu mikilvægt það er að hvetja strákana áfram, jafnvel ýta þeim áfram og undirbúa þá fyrir áskoranir í úrvalsdeildinni. Við í Njarðvík höfum í gegnum áratugina verið ófeimin við að tefla fram okkar ungu leikmönnum og munum halda áfram að gera það.”
![](https://www.karfan.is/wp-content/uploads/2024/07/GudjonLogiSigufsson-1024x768.jpg)
![](https://www.karfan.is/wp-content/uploads/2024/07/Kristofer-1-1024x768.jpg)
![](https://www.karfan.is/wp-content/uploads/2024/07/MikaelMani-1024x768.jpg)