Einn efnilegasti leikmaður landsins Kristófer Breki Björgvinsson hefur lokið leik og mun missa af næsta árinu eftir að hafa slitið krossbönd á dögunum. Kristófer sem leikur með Ármanni í 1. deildinni á venslasamningi frá Haukum sem er uppeldisfélag hans.
Tilkynningu Ármenninga má finna hér að neðan:
Þær ömurlegu fregnir bárust í morgunsárið að Kristófer Breki Björgvinsson leikmaður okkar er með slitið krossband eftir meiðsli sem hann hlaut í leik tvö gegn Selfossi. Kristófer átti stórbrotinn fyrri hálfleik í leiknum skoraði 24 stig og spilaði frábæran varnarleik.
Kristófer kom til liðsins snemma á tímabilinu á venslasamningi og hefur spilað frábærlega. Mikill stígandi hefur verið a hans leik og vorum við spennt að sjá hann blómstra í úrslitakeppninni.
Því miður er tímabilinu lokið og verður Kristófer frá í allt að ár. Það er fyrst og fremst svekkjandi fyrir þennan efnilega leikmann að þurfa að sitja hjá í þann tíma og missa af þeim baráttum sem framundan eru með félagsliðum og landsliðum. Við erum stolt af því að hafa haft Kristófer í okkar liði og munum styðja hann í þeirri endurhæfingu sem framundan er.
Þrátt fyrir þetta áfall er engan bilbug á okkur Ármenningum að finna, við ætlum að vinna úrslitakeppnina sem framundan er. Byrjum í Höllinni annað kvöld.
Sendum Kristófer okkar allra mestu batakveðjur og vonumst til að sjá hann á ný í Ármannstreyju
(@armannkarfa)
