Marvin og Dabney í stuði með Hamri

 

Karfan.is birtir nú umfjöllun og myndir frá viðureign Hamars og Breiðabliks sem fram fór síðastliðið mánudagskvöld og um leið biðjumst við velvirðingar á þeim töfum sem urðu á þessu efni.

Breiðablik kíkti í heimsókn austurfyrir fjall þar sem Hamar í Hveragerði voru gestgjafarnir. Fyrir leikinn var Breiðablik í næstneðsta sæti deildarinnar með einungis 2 stig en Hamar með 6 stig í 8.-9. sæti ásamt Tindastól.

 

Leikurinn var mjög jafn og spennandi í fyrrihálfleik. Eitthvað hik var í heimamönnum og léleg boltameðferð sást alltof oft sem sýndi sig í töpuðum boltum. Liðin skiptust á forrystunni en yfirleitt voru gestirnir einu skrefi á undan Hamri. Eftir 1. Leikhluta var staðan 22-21 Breiðablik í vil en athygli vakti að Marvin og Andre Dabney voru með öll stig Hamars í leikhluta, Dabney 14 og Marvin 7.

 

Gestirnir voru mun betri í upphafi 2. Leikhluta og var staðan orðin 23-31 þegar Hamarsmenn vöknuðu loksins og fóru að bíta frá sér. Þeir söxuðu jafnt og þétt á gestina aftur og var staðan 44-41 Hamri í vil þegar liðin gengu til búningsherbergja ásamt þjálfurum sínum. Þarna var Marvin kominn með 15 stig og Dabney 21.

 

3. Leikhlutinn hófst eins og leikurinn hafði spilast hingað til, jafn og spennandi. Þegar líða tók á leikhlutann fóru Hamarsmenn að sýna það sem þeir áttu inni og sigu framúr. Staðan fyrir lokaleikhlutann var 72-56 fyrir heimamönnum.

 

Blikar byrjuðu aftur betur í 4. Leikhluta og var staðan fljótlega orðin 75-63 og allt leit út fyrir að þetta yrði barátta í lokin. Blikar komust þó ekki nær heldur en 9 stig og sigruðu Hamarsmenn með 11 stigum, 89-78.

 

Marvin Valdimarsson: 35 stig og 10 fráköst.

Andre Dabney: 26 stig, 7 fráköst og 3 stoðsendingar.

Oddur Ólafsson: 8 stig og 4 fráköst

Svavar Páll Pálsson: 6 stig

Páll Helgason: 6 stig

Viðar Örn Hafsteinsson: 5 stig

Ragnar Nathanaelsson: 3 stig

 

 

Jeremy Caldwell: 15 stig og 17 fráköst

Jonathan Schmidt: 15 stig og 8 fráköst

Hjalti Friðriksson: 15 stig og 5 fráköst

Daníel Guðmundsson: 13 stig og 3 fráköst

Þorsteinn Gunnlaugsson: 8 stig og 7 fráköst

Ágúst Angantýsson: 8 stig

Arnar Pétursson: 4 stig