Magic með sigur í Staples Center

Í nótt fóru átta leikir fram í NBA deildinni. Orlando Magic gerðu góða ferð á vesturströndina og lögðu LA Clippers í Staples Center. Miami Heat gerðu einnig víðreist á vesturströndinni og burstuðu Sacramento Kings.

 

Arron Afflalo var atkvæðamestur í liði Orlando með 30 stig, 7 fráköst og 7 stoðsendingar en hjá Clippers var Blake Griffin með 30 stig, 8 fráköst og 7 stoðsendingar. Orlando batt þar með enda á félagsmet Clippers sem stóð í 13 heimasigrum í röð en Magic að sama skapi að komast á réttan kjöl eftir tíu tapleiki í röð!

 

Mario Chalmers fór hamförum í liði Heat með 34 stig en kappinn setti niður 10 af 13 þristum sínum í leiknum! Hann var einnig með 2 fráköst og 3 stoðsendingar en sex leikmenn Heat voru með 10 stig eða meira í leiknum. Isaiah Thomas var atkvæðamestur í liði Kings með 34 stig, 5 fráköst og 3 stoðsendingar.