Leikir kvöldsins: Lokaumferðin fyrir jól

Í kvöld er heil umferð í Iceland Express deild karla og jafnframt sú síðasta fyrir jólafrí. Í mörg horn verður að líta og venju samkvæmt hefjast allir leikirnir kl. 19:15. Í Garðabæ verður barist um 2. sætið í deildinni yfir jólahátíðina en þar mætast Stjarnan og Keflavík sem eru í 2.-3. sæti, bæði með 12 stig.

 

KR – Valur

Þór Þorlákshöfn – Tindastóll

Snæfell – Grindavík

Njarðvík – Fjölnir

Stjarnan – Keflavík

Haukar – ÍR

 

KR-Valur

Íslands- og bikarmeistarar KR mæta án erlendra leikmanna í kvöld en Valsmenn eru einum Darnell Hugee færri en þeir hafa látið kappann fara frá félaginu. Valsmenn eru sem fyrr á botni deildarinnar án stiga en KR-ingar eru í 5. sæti með 8 stig.

 

Þór Þorlákshöfn – Tindastóll

Nýliðar Þórs lögðu Grindavík í síðustu umferð og því er völlur á þeim þessa stundina. Stólarnir lögðu KR að sama skapi svo í Þorlákshöfn ættu að mætast vel þandir brjóstkassar í kvöld.

 

Snæfell-Grindavík

Hólmarar í 9. sæti með 6 stig og illir heim að sækja en Grindvíkingar töpuðu síðasta leik og hafa fengið rúman tíma til að jafna sig. Þetta verður mikill slagur og vafalítið fjölmennt á leiknum.

 

Njarðvík-Fjölnir

Bæði lið hafa 8 stig fyrir leikinn í kvöld, Fjölnir í sjöunda sæti en Njarðvík í því áttunda. Þessi tvö lið eru tvö af fjórum sem hafa átta stig í deildinni og berjast af mikilli hörku á miðsvæði töflunnar.

 

Stjarnan-Keflavík

Ef Grindavík tapar er ráðrúm til að jafna á toppnum eða taka annað sæti deildarinnar fyrir sig. Bæði Stjarnan og Keflavík eru með 12 stig og hafa verið löskuð undanfarið. Keflavík án Magnúsar Þórs Gunnarssonar og Arnars Freys Jónssonar en Garðbæingar hafa verið að leika án Jovan Zdravevski.

 

Haukar-ÍR

Haukar gætu komið sér úr fallsæti fyrir jól með sigri og þétt ennfrekar pakkann sem berst frá ellefta og upp í fjórða sæti deildarinnar. ÍR tapaði naumt heima gegn Stjörnunni í síðustu umferð og vilja vísast kvitta fyrir þau stig sem sluppu.