Undankeppni EuroBasket 2025 rúllar af stað í febrúar á næsta ári. Dregið var í riðla á dögunum, en þar kom Ísland upp úr pottinum í riðil B ásamt Ítalíu, Tyrklandi og Ungverjalandi. Ljóst er að í þeim riðil eru Ítalía og Tyrkland sterkustu liðin, en bæði eru þau í og í kringum top 10 á Evrópulista FIBA yfir sterkustu þjóðirnar. Það er þó ekki langt síðan Ísland bæði vann Ítalíu heima og var í hörkuleik gegn þeim ytra í undankeppni heimsmeistaramótsins og því ættu aðdáendur liðsins ekki að gefa upp alla von þó alþjóðasambandið meti mun liðanna tveggja mikinn.
![](https://www.karfan.is/wp-content/uploads/2023/08/hSvkgVeQjEeAdJkf_TBs8Q.png)
Gegn Tyrklandi tapaði Ísland örugglega á dögunum í forkeppni Ólympíuleikanna, þar sem að bæði NBA og EuroLeague leikmenn Tyrklands voru með, en ef landsliðsgluggarnir verða líkt og þeir hafa verið síðustu ár er ólíklegt að svo verði í þessari undankeppni.
![](https://www.karfan.is/wp-content/uploads/2023/08/tryggviturkol2023.jpeg)
Ungverjaland er það lið í riðlinum sem Ísland á fyrirfram mesta möguleika gegn og eru þeir ekki langt frá Íslandi á listanum, en það er komið nokkuð síðan liðin tvö áttust við í undankeppni eða almennum mótsleik einhverrar keppninnar. Ísland mætti þeim þó í æfingaleik nú fyrir forkeppni Ólympíuleikanna, þar sem leikurinn var nokkuð jafn, þó svo að í lið Íslands vantaði nokkra sterka leikmenn.
![](https://www.karfan.is/wp-content/uploads/2023/08/orrivsturk2023ol.jpeg)
Vegna góðra úrslita Íslands í síðustu keppnum þurfti liðið ekki að fara í neina forkeppni fyrir þessa undankeppni. Aðeins leika sex leiki (heima og heiman) í þessum fjögurra liða riðil, þar sem að þrjú efstu liðin komast á lokamótið.
Sæti á Evrópulista FIBA
Ítalía 7. sæti
Tyrkland 11. sæti
Ungverjaland 21. sæti
Ísland 26. sæti
Nú á dögunum varð svo ljóst hvenær þessir leikir fara fram. Skipulagið má sjá hér fyrir neðan, en Ísland hefur leik á heimavelli gegn Ungverjalandi þann 22. febrúar 2024.
Leikir undankeppni EuroBasket 2025
Ungverjaland (heima) – 22.02.24
Tyrkland (úti) – 25.02.24
Ítalía (heima) – 22.11.24
Ítalía (úti) – 25.11.24
Ungverjaland (úti) – 20.02.25
Tyrkland (heima) – 23.02.25