Kristjana Jónsdóttir er nýr þjálfari í Ljónagryfjunni en hún hefur verið ráðin sem aðstoðarþjálfari Rúnars Inga Erlingssonar með Njarðvík í Subway-deild kvenna. Þá mun Kristjana einnig taka að sér þjálfun hjá yngri flokkum félagsins.
„Við fögnum þessari ráðningu vel enda er hér öflugur þjálfari á ferðinni þrátt fyrir ungan aldur. Kristjana þekkir vel til úrvalsdeildarinnar sem og þjálfunar í yngri flokkum og við hjá UMFN erum mjög spennt fyrir komandi samstarfi,” sagði Halldór Karlsson formaður Njarðvíkur.
Kristjana hefur áður þjálfað m.a. í yngri flokkum í Keflavík, íslensku yngri landsliðin sem og hjá Fjölni og ÍR í úrvalsdeild kvenna. Hún á ekki langt að sækja körfuboltaáhugann en faðir hennar Jón Guðmundsson er bæði margreyndur þjálfari sem og körfuknattleiksdómari.
