Keppum um þau verðlaun sem eru í boði

Lengjubikarmeistarar Stjörnunnar ætla sér að keppa um alla þá verðlaunagripi sem í boði eru. Þeir eru einnig ríkjandi bikarmeistarar en þurftu að láta í minni pokann fyrir Njarðvík í fjórðungsúrslitunum á síðustu leiktíð. Hrafn Kristjánsson, þjálfari karlaliðs Stjörnunnar fer yfir málin með Karfan.is.

Leikmannahópurinn:

Komnir:
Tómas Heiðar Tómasson (Þór Þ)
Al´lonzo Coleman (Banda Norte, ARG)
Kristinn Ólafsson (Hamar)
Óskar Þór Þorsteinsson (yngri flokkar)
Tómas Þórir Tómasson (yngri flokkar)

Farnir:
Jón Orri Kristjánsson (hættur)
Dagur Kár Jónsson (Saint Francis University)
Elías Orri Gíslason (Valur – venslasamningur)
Sigurður Dagur Sturluson (Njarðvík)
Jeremy Atkinson (án liðs)
Jón Sverrisson (Fjölnir)
Christopher Cannon (pásu)

Hvernig hefur undirbúningur liðsins gengið í sumar og upp á síðkastið? 
Undirbúningur hefur gengið ágætlega.  Liðið er nokkurn veginn á þeim stað sem við ætluðum okkur á þessum tímapunkti en nokkur lítilsháttar meiðsli að stríða okkur þessa dagana.

Komandi tímabil og væntingar þjálfara og liðsins til þess?
Væntingarnar eru tvíþættar.  Annars vegar viljum við keppa um þau verðlaun sem eru í boði í vetur og hins vegar halda áfram að þróa okkur ungu leikmenn og veita þeim aukin tækifæri í efstu deild.

Hvaða lið telur þú sterkust í dag fyrir mót?
Fyrir mér eru KR-ingar með langsterkasta leikmannahópinn á hinum margfræga pappír.  Stólar eru all-in fyrir veturinn og ætla sér einnig stóra hluti.  Við í Garðabænum Haukamenn og fleiri ætlum okkur svo að blanda okkur í umræðuna og stríða þessum tveimur liðum hvað mest við getum.