Joshua Brown leiddi KR til sigurs í sínum fyrsta leik

KR sigraði Hauka í Iceland Express deild karla í gærkvöld þegar að liðin mættust í DB Schenker-höllinni í Hafnarfirði. Úr varð hörku leikur þar sem spilað var nokkuð hart á báðum endum vallarins. KR frumsýndi nýja leikmenn sína þá Robert Ferguson og Joshua Brown en serbneski leikmaðurinn Dejan Sencanski kom ekki við sögu.

Haukur Óskarsson, Haukum, var meira en tilbúinn í slaginn og skorði fyrstu 10 stig Hauka. Hann fékk einnig allar þrjár villurnar sem dæmdar voru á Hauka í upphafi leiks sem gerði það að verkum að hann sást minna á velli.

 

Leikurinn var jafn og spennandi og var greinilegt að Hauka langar og ætla sér að sigra nokkra körfuboltaleiki eftir áramót. Rauðir börðust eins og ljón og köstuðu sér á lausa bolta og gegn liði eins og KR þarf að vera á tánum allan tímann. Robert Ferguson byrjaði ágætlega fyrir KR á meðan Brown var lengur að finna sig en eftir að það gerðist þá var ekki aftur snúið. Brown var lang besti maður KR-inga en þetta er með eindæmum snöggur leikmaður og var óhræddur að vaða á körfuna.

Haukar leiddu með einu stigi, 22-21, eftir fyrsta leikhluta og tóku svo frábæran kafla í upphafi annars og náðu upp mest 11 stiga forskoti í fyrri hluta leikhlutans. Hrafn Kristjánsson, þjálfari KR, tók leikhlé og mun beittari KR-ingar komu inn á völlinn. Hægt og bítandi unnu þeir upp muninn og minnkuðu muninn niður í tvö stig áður en gengið var til búningsherbergja í hálfleik.

KR tók öll völd í þriðja leikhluta en þessi leikhluti hefur verið hvað verstur fyrir Hauka í vetur. Fljótlega voru Vesturbæingar komnir 11 stigum yfir og gjörsamlega búnir að snúa taflinu við. Haukar skoruðu aðeins 12 stig í leikhlutanum og KR leiddi með 11 stigum 53-64 fyrir fjórða leikhluta.

Haukar gerðu það sem þeir gátu til að minnka muninn og nokkrum sinnum gerðu þeir þetta að leik ef svo mætti að orði komast. Vendi punkturinn var þó þegar Haukar skoruðu flotta körfu og minnkuðu muninn niður í fjögur stig en Joshua Brown svaraði með þriggja stiga körfu, fyrir KR, á loka sekúndu skotklukkunnar. Skot Brown var í algjörri neyð og verður að segjast að skotið sem að ungur Hafnfirðingur tók og  smellti ofan í milli fyrsta og annars leikhluta hafi verið mun betra. Þessi ungi áhorfandi hélt heim sáttur og glaður með 10 kassa af kók í farteskinu.

Við þessa körfu frá Brown datt aðeins botninn úr leiknum þó svo að rauðir hafi barist áfram fram á síðustu mínútur. Svo fór að KR vann með átta stigum 74-82 og Haukar áfram í 11. sæti deildarinnar en KR lyftir sér upp í 6. sæti úr því 7.

Joshua Brown var stigahæstur KR með 26 stig og 5 stolna bolta og Robert Ferguson var honum næstur með 17 stig og 6 fráköst.

Hjá Haukum var það Hayward Fain sem að var atkvæðamestur með 18 stig og 8 fráköst og Chris Smith var honum næstur með 16 stig og 12 fráköst.

Mynd: [email protected]

[email protected]