Jóhannes: KR-ingar tryggja sér sigurinn með umdeildum vítaskotum eftir að leiktíminn er liðinn

Ef einhver mætir í DHL-Höllina í kvöld þá er það Jóhannes Árnason, leikmaður úr hinum fræga 1980 árgangi þeirra KR-inga og fyrrum þjálfari kvennaliðs félagsins. Við tókum púlsinn á Jóa sem býst við dramatík þegar KR og Grindavík mætast í Iceland Express deild karla í kvöld.

 

 

Þetta byrjar á börger og kaldri kók þar sem farið verður yfir möguleika KR liðsins í kvöld. Ef leikmenn KR fara eftir því sem við spekingarnir komumst að í félagsheimilinu þá vinna þeir. Ef ég á að sjá þetta fyrir þá held ég að þetta verði hraður leikur með miklu stigaskori og það lið vinnur sem verður með betri 3 stiga nýtingu. Annars held ég að þetta séu tvö skemmtilegustu liðin í ár og leikurinn verður skemmtilegur.

 

Við KRingar erum mjög hrifnir af hæfileikaríkum leikmönnum og því verður spennandi að sjá Ólaf í háloftunum í kvöld. Hann á alltaf góða leiki á móti KR. Við eigum einn geimfara sjálfir sem heitir Kristófer og alltaf spennandi að sjá hvort hann nái inn einni troðslu eða svo. Annars mun mikið mæða á erlendum leikmönnum beggja liða jafnt sem stóru strákunum. Siggi Þorsteins spilar alltaf vel í DHL höllinni og það er lykilatriði fyrir KR að halda honum fyrir neðan meðaltal.

 

Ég á ekki von á öðru en að stúkan verði troðfull í kvöld. Stuðningsmenn beggja liða munu fjölmenna og ég ætla að skjóta á það að liðið sem á fleiri troðslur í leiknum vinni stúkuslaginn.

 

Þjálfararnir leggja eflaust upp með það að leikmenn séu einbeittir frá byrjun því hvorugt lið vill lenda mikið undir til að byrja með. Báðir þjálfarar munu því leggja mesta áherslu á vörnina. Mér þykir ekki ólíklegt að planið sé að byrja á því að fara undir körfuna og opna þannig fyrir skytturnar.

 

Grindavík er og hefur alltaf verið með þannig lið að það getur skorað 10 stig á einni mínútu og breytt gangi leiksins á augabragði. Þar geta allir skorað þannig að KRingar verða að taka þetta eins og alkarnir í skrefum, eitt skref í einu.

 

Annars vona ég að þetta verði skemmtilegur leikur og það er pottþétt mál að leikmennirnir vilja standa sig vel í kvöld. Leikurinn fer 103-102 fyrir KR þar sem KRingar tryggja sér sigurinn með umdeildum vítaskotum eftir að leiktíminn er liðinn.