Körfuknattleiksdeild Stjörnunnar bauð til blaðamannafundar í kvöld er félagið kynnti nýjasta leikmann liðsins. Fyrirliði landsliðsins Hlynur Bæringsson hefur ákveðið að semja við félagið og leika í Dominos deildinni á næsta tímabili.
Karfan.is náði tali af Hlyni sem kom beint úr Laugardalshöll þar sem liðið hafði unnið Sviss í fyrsta leik í undankeppni Eurobasket.
„Mikill léttir að vera búinn að taka ákvörðun. Þetta er búið að vera hangandi yfir mér síðan Sundsvall kom sér í gjaldþrot í maí. Góð tilfinning að vera búin að taka ákvörðun. Körfuboltalega séð er þetta mikil áskorun.“ sagði Hlynur Bæringsson rétt eftir undirskriftina.
„Var ekki viss hvort ég vildi koma heim og þetta tók lengri tíma en ég hefði viljað. Ég ræddi við vel flest lið, það var skemmtilegt en erfitt ferli. Það voru margir góðir kostir.“
„Ég hef verið svolítið úti á landi á Íslandi þannig þetta er annar pakki. Ég lít á þetta sem áskorun en líst vel á þetta. Þetta er stór ákvörðun, tek fjölskylduna með mér heim og skil eftir aðstæður í Svíþjóð sem mér leið vel í.“
„Ég ætlaði klára þetta fyrir fyrsta leikinn úti og það rétt hafðist. Þetta drógst of lengi, ákveðin ákvöðrunarfælni en finn núna að ég er ofboðslega ánægður með hana.“
Hlynur var nýkominn úr með með landsliðinu eftir leikinn gegn Sviss auk þess sem lagt verður af stað til Kýpur í nótt og því langt ferðalag framundan „Ég er rosalega þreyttur. Þetta var sérstakur dagur“ sagði Hlynur að lokum.
Viðtalið í heild má sjá hér að neðan:
Viðtal og texti / Ólafur Þór Jónsson
