Haukar unnu langþráðan sigur í Iceland Express deild kvenna í kvöld þegar liðið lagði nýkrýnda bikarmeistara Keflavíkur 81-84 í Toyota-höllinni í Reykjanesbæ. Sigurinn var langþráður hjá Hafnarfjarðarliðinu enda hafði liðið m.a. tapað síðustu fimm heimaleikjum sínum í deildinni. Sigur Hauka í kvöld hafði þó engin áhrif á stöðu liðsins í A-riðil en sama hver úrslit kvöldsins voru og hver þau verða í næstu umferð þá munu Haukar hafna í 4. sæti A-riðils.
Jafnræði var með liðunum í upphafi leiks og sú varð raunin út allan leikinn. Liðin voru með sóknarleikinn á oddinum í fyrri hálfleik og leiddu Keflvíkingar 47-40 að honum loknum. Margir leikmenn í báðum liðum fengu að spreyta sig á fyrstu tuttugu mínútunum en Bryndís Guðmundsdóttir var með 12 stig hjá Keflavík í hálfleik og Katie Snodgarss með 11 hjá Haukum.
Spennan fór vaxandi með hverri mínútu og skiptust liðin á því að hafa 1-2 stiga forystu í síðari hálfleik. Keflvíkingar reyndu fyrir sér í 3-2 svæðisvörn þegar um þrjár mínútur voru til leiksloka en Haukar hirtu stigin tvö sem í boði voru og gerðu það á vítalínunni þar sem úrslitin réðust, 81-84.
Heildarskor:
Keflavík: Jacquline Adamshick 27/8 fráköst, Bryndís Guðmundsdóttir 22/9 fráköst, Pálína Gunnlaugsdóttir 7, Ingibjörg Jakobsdóttir 7, Marina Caran 6/4 fráköst/5 stoðsendingar, Hrund Jóhannsdóttir 5, Marín Rós Karlsdóttir 3, Árný Sif Kristínardóttir 3, Sigrún Albertsdóttir 1, Lovísa Falsdóttir 0, Hrönn Þorgrímsdóttir 0, Eva Rós Guðmundsdóttir 0.
Haukar: Kathleen Patricia Snodgrass 28, Ragna Margrét Brynjarsdóttir 19/11 fráköst, María Lind Sigurðardóttir 10, Margrét Rósa Hálfdánardótir 9/4 fráköst, Helga Jónasdóttir 6/4 fráköst, Íris Sverrisdóttir 4, Dagbjört Samúelsdóttir 4, Guðrún Ósk Ámundardóttir 4/4 fráköst, Sara Pálmadóttir 0, Kristín Fjóla Reynisdóttir 0, Auður Íris Ólafsdóttir 0, Ína Salóme Sturludóttir 0.
Dómarar: Davíð Kr. Hreiðarsson, Steinar Orri Sigurðsson
Ljósmynd/ [email protected] – Kristín Fjóla Reynisdóttir sækir að Keflavíkurvörninn í kvöld.
