Ashley Grimes erlendur leikmaður kvennaliðs Grindavíkur hefur tilkynnt félaginu að hún muni ekki snúa aftur á völlinn á nýju ári. Þessa blautu tusku fengu þeir Grindvíkingar í andlitið þann 28. desember sl. og því hefur allt farið á fullt nú að leita af nýjum erlendum leikmanni. Grindvíkingar segja í tilkynningu að vissulega hefði verið betra að fá að heyra þetta fyrr og telja þeir að þessi ákvörðun hennar hafi verið gerð um leið og hún fór í jólafríið. Grindvíkingar eru einnig á því að Ashley hafi aldrei náð að festa sig nægilega vel í sessi í Grindavíkinni og mögulega er þessi ákvörðun hennar "blessun í dulargervi" eins og segir í tilkynningunni.
Til að bæta svo í hefur Bjarni Magnússon þjálfari liðsins verið í veikindum og því Ellert nokkur Magnússon séð um að stýra æfingum liðsins milli hátíðanna. Fyrsti leikur liðsins er gegn Stjörnunni á laugardag í Grindavík og ljóst að liðið verður án erlends leikmanns í þeim leik.
