Sindri hefur samið við þá Gabriel Adersteg frá Svíþjóð og Ismael Herrero Gonzalez frá Spáni fyrir komandi átök í fyrstu deild karla.
Gabriel er skotbakvörður sem mun vera að leika sitt þriðja tímabil á Íslandi, en hann kemur til liðsins frá Vestra. Með þeim skilaði hann 17 stigum, 6 fráköstum og 3 stoðsendingum að meðaltali í leik í fyrra. Þar áður hafði hann verið á mála hjá Snæfell.
Ismael er einnig bakvörður, en hann kemur til Sindra frá Zentro San Jorge í Leb Silver deildinni, þar sem hann hefur spilað síðastliðin þrjú tímabil.
Tilkynning:
Tveir leikmenn hafa ákveðið að ganga til liðs við okkur fyrir komandi átök.
Fyrst ber að nefna Gabriel Adersteg. Gabríel kemur frá Svíþjóð en hélt til á Ísafirði í fyrra og spilaði með Vestra. Þar skilaði hann 16,5 stigum, 6 fráköstum og 3 stoðsendingum í leik. Þar áður var hann á mála hjá Snæfell og verður þetta því hans þriðja tímabil hér á Íslandi. Gabríel er hávaxinn framherji sem getur spilað bæði stöðu skotbakvarðar sem kraft framherja. Hann kemur til með að auka enn frekar á hæð liðsins enda um 2 metrar a hæð.
Einnig hefur Ismael Herrero Gonzalez ákveðið að leggja leið sína til okkar í Sindra en hann kemur frá Spáni. Þar hefur hann spilað með Zentro San Jorge í Madrid síðastliðin þrjú ár. Fyrst í EBA deildinni og svo í Leb Silver í fyrra. Isma er fjölhæfur bakvörður og leikstjórnandi sem kemur til með að auka á breidd liðsins.
