Bobcats lágu heima í framlengingu

Sex leikir fóru fram í NBA deildinni í nótt. Charlotte Bobcats sem á síðustu leiktíð urðu þess vafasama heiðurs aðnjótandi að geta kallað sig lélegasta lið sögunnar í NBA hafa bitið frá sér þessa vertíðina en lágu heima í nótt. Portland koma þá í heimsókn og hafði betur 112-118 eftir framlengingu.

 

Ben Gordon var stigahæstur í liði Bobcats með 29 stig af bekknum og Kemba Walker bætti við 22 stigum, 5 fráköstum og 7 stoðsendingum. Hjá Portland var LaMarcus Aldridge með 25 stig, 13, fráköst og 5 stoðsendingar. Bobcats klúðruðu niður 15 stiga forystu í fjórða leikhluta og framlengja varð leikinn í stöðunni 102-102 eftir að lokaskot Kemba Walker vildi ekki niður. Portland reyndust svo sterkari í framlengingunni og unnu hana 10-16.