09:40
{mosimage}
Hvergerðingar rétt missa af úrslitakeppninni samkvæmt spánni frá Karfan.is. Reynsluboltinn úr Borgarnesi, Ari Gunnarsson, er genginn í raðir H/S en ekki er búist við miklu frá honum inni á vellinum en hann verður Pétri Ingvarssyni, þjálfara, innan handar á hliðarlínunni og á örugglega eftir að miðla töluverðri reynslu til yngri leikmann H/S og reynast þeim haukur í horni.
Á síðustu leiktíð luku H/S keppni í níunda sæti deildarinnar og rétt misstu af úrslitakeppninni. Helsta driffjöðurin hjá H/S í fyrra var bakvörðurinn Clifton Cook sem var með 27,3 stig að meðaltali í leik. Nú er Bandaríkjamaðurinn Lewis Monroe genginn í raðir Hvergerðinga en hann mun skila sömu stöðu og Clifton gerði í fyrra, bakvörður/skotbakvörður.
Það er mikill hvalreki fyrir H/S að bakvörðurinn Lárus Jónsson hafi snúið aftur á fornar slóðir en þar er á ferðinni duglegur bakvörður. Eldur Ólafsson gekk einnig í raðir H/S fyrir þessa leiktíð en hann er bróðir Fannars Ólafssonar, landsliðsmiðherja, og ef hann á skap til eins og bróðir sinn gæti hann reynst H/S mikil hjálp en Eldur hefur átt við meiðsli að stríða og er óðum að ná sér af þeim.
Pétur Ingvarsson, þjálfari, er mikill reynsluhundur og jafnvel enn þann dag í dag gæti hann látið að sér kveða á parketinu en þó er búist við því að hann verði á hliðarlínunni. Bojan Bojovic verður með H/S í vetur en hann lék 7 leiki með Haukum í fyrra og gerði þar 8,4 stig að meðaltali í leik.
Það verður annasamur vetur hjá Svavari Pálssyni að vanda en í fyrra gerði hann 10,7 stig að meðaltali í leik með H/S en ef liðið á að ná inn í úrsitakeppnina í ár þarf að koma meira frá honum.
Leikmannahópur H/S:
Bragi Bjarnason
Friðrik Hreinsson
Lárus Jónsson
Lewis Monroe
Magnús Sigurðsson
Páll Helgason
Ari Gunnarsson
Atli Gunnarsson
Bojan Bojovic
Eldur Ólafsson
Hallgrímur Brynjólfsson
Ívar Hafsteinsson
Jón Jónasson
Frosti Sigurðarson
Rúnar Sævarsson
Svavar Pálsson
Tryggvi Úlfsson
Samkvæmt spánni hafnar Hamar/Selfoss í 9. sæti deildarinnar eða í sama sæti og í fyrra og er helsta skýringin sú að íslensku leikmennina í liðinu skortir reynslu í deildinni og fáir af þeim hafa spilað stór hlutverk t.d. í úrslitakeppninni.
Mynd: Sverrir Þorsteinsson
