22:14
{mosimage}
(Hörður Axel átti stórleik í Njarðvíkurliðinu í kvöld)
Njarðvíkingar eru komnir á topp Iceland Express deildar karla í körfuknattleik eftir góðan 83-68 sigur á bikarmeisturum ÍR. Leikurinn var annar tveggja lokaleikja þriðju umferðar í deildinni. Njarðvík og Keflavík sitja nú jöfn á toppi deildarinnar, bæði ósigruð eftir þrjár umferðir og mætast liðin í grannarimmu á sunnudag sem enginn ætti að láta fram hjá sér fara. Hörður Axel Vilhjálmsson átti mestan þátt í að skapa Njarðvíkursigurinn í kvöld er hann einn síns liðs skaut ÍR-inga í kaf um miðbik loka leikhlutans. Frá þessu er greint á www.vf.is
Kuldinn í Ljónagryfjunni var álíka og sá er nú kallar fram sultardropa utandyra. Bæði Njarðvík og ÍR voru á hælunum í upphafi leiks og var staðan 6-6 þegar þrjár mínútur voru eftir af upphafsleikhlutanum. Liðin rönkuðu þó lítið eitt við sér og staðan var 13-12 Njarðvík í vil að loknum drepleiðinlegum upphafsleikhluta.
Liðin tóku við sér í öðrum leikhluta en bæði voru þau áfram óvarkár á boltann en Njarðvíkingar töpuðu 22 boltum í leiknum í kvöld gegn 14 hjá ÍR. Steinar Arason átti fína innkomu hjá ÍR í leikhlutanum en það voru Njarðvíkingar sem leiddu í hálfleik 37-30. Þeir Steinar Arason, Ómar Sævarsson og Sonny Troutman voru allir með sex stig í hálfleik í liði ÍR og þá var Hreggviður Magnússon kominn með þrjár villur. Egill Jónasson var stigahæstur heimamanna í leikhléi með 9 stig.
{mosimage}
(Ómar barðist vel fyrir ÍR)
Fyrri hálfleikurinn olli miklum vonbrigðum en liðin fóru þó að finna taktinn í síðari hálfleik. Gestirnir úr Breiðholti minnkuðu muninn í 43-40 með þristum frá Hreggviði Magnússyni og Steinari Arasyni og fyrir vikið tóku Njarðvíkingar leikhlé. Teitur Örlygsson gaf þeim ærlegt orð í heyra og hans menn bættu við sig snúning og gerðu 12 stig gegn tveimur frá ÍR á skömmum tíma og staðan orðin 55-42 Njarðvík í vil. Gestirnir náðu að klóra í bakkann með þriggja stiga körfu frá Sveinbirni Claessen og staðan orðin 58-53 þegar skammt var eftir af þriðja leikhluta. Þetta voru fyrstu stig Sveinbjarnar í leiknum og ef ÍR á að ganga vel verður hann að eiga mun betri kvöld en hann átti í Ljónagryfjunni þetta skiptið.
Þriðja leikhluta lauk í stöðunni 61-53 Njarðvík í vil en ÍR voru enn inni í leiknum. Þegar fjórði leikhluti hófst benti allt til þess að um spennandi lokasprett yrði að ræða, þangað til Hörður Axel Vilhjálmsson brá á leik. Þegar rúmar fimm mínútur voru til leiksloka setti Hörður niður þrjár þriggja stiga körfur og kveikti gjörsamlega í Njarðvíkingum sem sigldu lygnan sjó að sigrinum.
{mosimage}
(Brenton gerði 16 stig og tók 10 fráköst í kvöld)
Lokatölur leiksins voru 83-68 þar sem Hörður Axel var vafalítið maður leiksins og steig upp á mikilvægri stundu í Njarðvíkurliðnu. Ómar Sævarsson var sá eini sem virtist með lífsmarki hjá ÍR en hann gerði 16 stig og tók 18 fráköst ásamt því að gefa 5 stoðsendingar og verja 3 skot.
Njarðvíkingar eru því á toppi deildarinnar með Keflvíkingum og er þegar komin mikil spenna í Reykjanesbæ fyrir rimmu liðanna á sunnudag. Ljóst má þó vera að Njarðvíkingar þurfa að leika betur á sunnudag en þeir gerðu í kvöld því í raun áttu þeir bara 5-7 góðar mínútur í kvöld. Grænir voru að fá mikið af opnum skotum en þeir hittu aðeins úr 4 af 13 þriggja stiga skotum sínum og 17 af 25 vítum. Þeir mega prísa sig sæla yfir því að hafa hitt á slæman dag hjá ÍR.
Bandaríkjamennirnir Charleston Long, UMFN, og Sonny Troutman, ÍR, ættu báðir að athuga hvort ekki sé farið að hitna undir þeirra sætum í liðum sínum því hvorugur þeirra hefur enn sýnt sitt rétta andlit og spurning hvort þjálfararnir Teitur Örlygsson og Jón Arnar Ingvarsson hafi þolinmæði fyrir fleiri slakar frammistöður af þeirra hálfu.
{mosimage}
(Friðrik gerði 13 stig og tók 6 fráköst)
