Hér fyrir neðan eru nokkur af þeim atriðum sem Körfunni hafa borist til eyrna á síðustu dögum er varða leikmenn, þjálfara og félög á Íslandi. Tekið skal fram að hér er um að ræða óstaðfestar fregnir og því ber að taka þeim sem slíkum.
- Heyrst hefur að Kári Jónsson hafi skrifað undir nýjan samning við Íslandsmeistara Vals
- Talið er líklegt að þó að landsliðsmaðurinn Gunnar Ólafsson hafi skrifað undir nýjan samning við Stjörnuna, þá muni hann ekki leika með þeim á komandi tímabili þar sem hann hyggji á nám í Svíþjóð
- Margir hafa verið nefndir sem mögulegir arftakar Baldurs Þórs Ragnarssonar hjá Tindastól í Subway deild karla, samkvæmt orðinu á götunni er félagið búið að fá neitun frá Helga Frey Margeirssyni, sem fékk fyrstur boð um starfið. Næstir á lista hjá félaginu eru Hörður Unnsteinsson úr KR, Pavel Ermolinski úr Val og Brynjar Þór Björnsson frá KR
- Þá hafa Pétur Már Sigurðsson þjálfari Vestra, Chris Caird þjálfari Selfoss og Sævaldur Bjarnason þjálfari undir 18 ára liðs Íslands einnig verið nefndir sem mögulegir arftakar Baldurs á Sauðárkróki
- Landsliðsmaðurinn og leikmaður Tindastóls Sigtryggur Arnar Björnsson er talinn líklegur til þess að yfirgefa félagið fyrir komandi tímabil og fara aftur í Leb Oro deildina á Spáni
- Hinn efnilegi Kristján Fannar Ingólfsson leikmaður Stjörnunnar er sagður allt eins líklegur til þess að ganga aftur til liðs við uppeldisfélag sitt í Keflavík fyrir komandi tímabil fari svo hann ákveði að yfirgefa Garðabæinn
- Ungstirni Breiðabliks Hilmar Pétursson er sagður næsta örugglega yfirgefa Ísland fyrir komandi tímabil og að líklega sé hann á leiðinni til Þýskalands
- Jose Medina fyrrum leikmaður Hauka er orðaður við ÍR, Sindra og Álftanes
- Magnús Lúðvíksson leikmaður Stjörnunnar (lék einnig með Álftanesi á síðasta tímabili) er samkvæmt orðrómi að ganga til liðs við Selfoss fyrir komandi tímabil
- Þá hefur heyrst að Róbert Sigurðsson sé líklegur til þess að yfirgefa ÍR fyrir komandi tímabil og komi bæði til greina fyrir hann að ganga til liðs við nýliða Hauka, sem og uppeldisfélag sitt í Fjölni
- Haukar eru einnig sagðir á eftir leikmanni Íslandsmeistara Vals, Pablo Bertone, en hann lék fyrir þá fyrst þegar hann kom til Íslands tímabilið 2020-21
- Þá eru Subway deildar Þórsarar orðaðir við Clayton Ladine, sem síðast lék fyrir Hrunamenn
- Samkvæmt orðrómi mun Vestri hafa athugað möguleika þess að fara niður um tvær deildir fyrir komandi tímabil og leika í annarri á komandi tímabili, sem myndi þýða að lið ÍA færi ekki niður úr þeirri fyrstu eftir að hafa fallið síðasta vetur
Orðið á götunni er einungis til gamans og ef fólk hefur ábendingar um slúður skal hafa samband á [email protected]
