13:10
{mosimage}
Rob Hodgson og stelpurnar í U 16 ára landsliði Íslands máttu sætta sig við stóran ósigur gegn Svíþjóð í dag en lokatölurnar voru 54-81 Svíum í vil. Heimamenn í Svíþjóð afgreiddu leikinn snemma en þær komust í 0-25 áður en íslenska liðið náði að svara. Guðbjörg Sverrisdóttir var stigahæst íslensku leikmannanna í dag með 11 stig og 4 fráköst.
Stærðarmunurinn á liðunum var töluverður og tóku íslensku stelpurnar 22 fráköst í leiknum gegn 47 hjá Svíum. Eftir fyrsta leikhluta var staðan 7-29 fyrir Svíþjóð og ljóst að framhaldið yrði þyrnum stráð hjá Íslandi.
Vörnin hjá íslensku stelpunum small saman í öðrum leikhluta og á köflum tókst þeim að loka vel á gestgjafana en munurinn var orðinn of mikill og því virtust góðar rispur Íslands aðeins virka sem dropi í hafi. Staðan í hálfleik var 23-47 fyrir Svíþjóð.
Í síðari hálfleik var aldrei spurning um hvort liðið færi með sigur af hólmi og þrátt fyrir fínar rispur hjá íslensku stelpunum voru Svíar einfaldlega betri á flestöllum sviðum leiksins.
{mosimage}
Stigaskor íslenska liðsins
Guðbjörg Sverrisdóttir 11
Elma Jóhannsdóttir 9
Dagmar Traustadóttir 8
Rannveig Ólafsdóttir 6
Hrafnhildur Sif Svavarsdóttir 5
Heiðrún Kristmundsdóttir 4
Thelma Ásgeirsdóttir 4
María Jónsdóttir 3
Ína María Einarsdóttir 3
Jenný Haraldsdóttir 1
Við biðjumst velvirðingar á því að beina netútsendingin datt niður undir loka fjórða leikhluta en álag á internetinu í Solnahallen þoldi ekki lengur við. Þessu hefur þó verið kippt í lag og eftir stutta stund verður U 16 ára leikur Íslands og Svíþjóðar í karlaflokki í beinni útsendingu en félagarnir Snorri Örn Arnaldsson og Ingi Þór Steinþórsson munu lýsa leiknum af kostgæfni. Sigur hjá 16 ára liði karla í dag fer langa leið með að tryggja strákunum inn í úrslitaleikinn. Sjá leikinn í beinni!
{mosimage}