15:23
{mosimage}
Stelpurnar í U 16 ára landsliðinu máttu sætta sig við 41-61 ósigur gegn Dönum í sínum síðasta leik í riðlakeppninni á Norðurlandamótinu í Solna í Svíþjóð. Guðbjörg Sverrisdóttir var atkvæðamest í liði Íslands með 13 stig, 13 fráköst og 4 stoðsendingar. Danir leiddu allan leikinn en Íslendingar gerðu harða atlögu að forskotinu en þeim tókst ekki að brjóta ísinn og því fögnuðu Danir sigri.
Danska vörnin lék íslenska liðið grátt í upphafi leiks og hin danska Helene Henriksen sýndi enga miskunn og stal hverjum boltanum af öðrum af íslensku stelpunum. Staðan að loknum fyrsta leikhluta var 9-18 Dönum í vil eftir fín rispu Íslands undir lok leikhlutans.
Danir sigu fram úr í öðrum leikhluta og náðu að auka muninn í 15 stig, 20-35 og þannig stóðu leikar í hálfleik.
Í þriðja leikhluta áttu Íslendingar góða spretti og voru farnar að anda ofan í hálsmálið á danska liðinu. Munurinn fór þó upp í 12 stig og var 34-46 fyrir fjórða leikhluta.
Íslenska liðið fór nokkuð óvarlega með boltann í leiknum og tapaði liðið honum 28 sinnum. Danir reyndust síðar mun sterkari á endasprettinum og náðu muninum upp í 20 stig og þannig lauk leik, 41-61 Dönum í vil.
Norðmenn leika nú gegn Svíum en ljóst er að Finnar og Svíar leika um gulli. Íslendingar og Danir mætast á morgun í leik um bronsið og Norðmenn reka lestina. Þrátt fyrir að Norðmönnum takist að vinna sigur á Svíum í yfirstandandi leik hefur Ísland betur innbyrðis gegn Norðmönnum svo nokkuð endanleg mynd er komin á riðilinn.
{mosimage}
Stigaskor Íslands í leiknum
Guðbjörg Sverrisdóttir 13
Dagmar Traustadóttir 5
Ína María Einarsdóttir 5
Rannveig Ólafsdóttir 4
Telma Ásgeirsdóttir 4
María Jónsdóttir 3
Árný Þóra Hálfdánardóttir 2
Berglind Gunnarsdóttir 2
Elma Jóhannsdóttir 2
Hrafnhildur Sif Svavarsdóttir
{mosimage}
