09:36
{mosimage}
(Vörn Boston reyndist Cleveland um megn í nótt)
Boston Celtics höfðu öruggan sigur á Cleveland Cavaliers í nótt í öðrum leik liðanna í undanúrslitum á Austurströnd NBA deildarinnar. Lokatölur leiksins voru 89-73 Celtics í vil en Cavaliers hófu leikinn með látum og leiddu á kafla 9-21 en heimamenn voru fljótir að snúa taflinu sér í vil.
Paul Pierce gerði 19 stig og tók 6 fráköst fyrir Celtics í nótt en LeBron James mátti enn að nýju sætta sig við slaka skotnýtingu gegn Celtics. James var stigahæstur hjá Cleveland með 21 stig en hann setti aðeins niður 6 af 20 teigskotum sínum og brenndi af öllum fjórum þriggja stiga skotum sínum sem þýðir að hann hefur tekið 10 þriggja stiga skot í tveimur leikjum gegn Celtics og klikkað úr þeim öllum. Þá var James með 6 stoðsendingar og 5 fráköst en hann tapaði 7 boltum og hefur því tapað boltanum 17 sinnum í fyrstu tveimur leikjunum gegn Boston.
Þá tókst meisturum San Antonio Spurs að minnka muninn í 2-1 gegn spútnikliði New Orleans Hornets. Liðin áttust við í AT&T Center í San Antonio þar sem heimamenn fóru með 110-99 sigur af hólmi.
Tony Parker og Manu Ginobili áttu góðan dag í liði Spurs, báðir með 31 stig en Parker gaf auk þess 11 stoðsendingar. Hjá Hornets var leikstjórnandinn magnaði, Chris Paul, með 35 stig og 9 stoðsendingar.
