11:06
{mosimage}
Alls eru fimm leikir á dagskrá í körfuboltanum á Ólympíuleikunum í Peking í dag og hófust leikar í nótt. Keppt er í kvennaflokki í dag þar sem áttust við í fyrsta leik dagsins lið Hvíta-Rússlands og Rússlands. Skemmst er frá því að segja að hart var barist þar sem Rússar fóru að endingu með 71-65 sigur í leiknum. Maria Stepanova var stigahæst í liði Rússa með 13 stig og 8 fráköst.
Í öðrum leiknum mættust Spánn og Tékkland þar sem Spánverjar fóru með öruggan 74-55 sigur af hólmi og gerði Anna Montanana 20 stig og tók 5 fráköst í liði Spánar.
Lettar unnu sterkt lið Brasilíu í háspennuleik, 79-78, þar sem Anete Jekabsone-Zogota gerði 25 stig og gaf 5 stoðsendingar hjá Lettum.
Heimamenn í Kína tóku svo á móti Nýsjálendingum og lönduðu þar öruggum sigri á gestum sínum 80-63. Nan Chen fór mikinn í liði Kínverja og gerði 26 stig og tók 17 fráköst fyrir Kínverja.
Tveimur leikjum er enn ólokið í kvennakeppninni í dag en það eru viðureignir Ástralíu og Kóreu og í síðasta leiknum mætast Malí og Bandaríkin.
