10:44:27
Ekki er hægt að segja að val LA Clippers á Blake Griffin með fyrsta valrétti nýliðavalsins hafi komið á óvart, enda var löngu vitað að framherjinn stæðilegi var lang-efnilegasti leikmaðurinn í valhópnum.

Ítarleg umfjöllun körfunnar.is um nýliðavalið hér að neðan…

Þó árgangurinn 2009 sé ekki mjög hátt skrifaður í samanburði við suma af síðustu árgöngum ættu að leynast þar nokkrir góðir leikmenn sem verða í deildinni næstu árin. Stæstu spurningarnar lutu að því hvern Memphis myndu taka með öðrum valrétti. Miðherjinn Hasheem Thabeet og spænski leikstjórnandinn Ricky Rubio voru lengst af taldir líklegastir en mikill aukakostnaður við að kaupa undrabarnð 18 ára varð sennlega til þess að Grizzlies ákváðu að taka áhættuna á að taka Tansaníumanninn risavaxna (221sm). Hann er gríðarsterkur varnarmaður og frákastari, en jafn takmarkaður sóknarlega og hann er góður varnarlega. Hafa margir líkt honum við Dikembe Mutombo og verður þá ekki leiðum að líkjast.

Rubio fór ekki fyrr en Minnesota tóku hann með fimmta valrétti. Minnestota áttu fjóra valrétti í fyrstu umferð, nr. 5, 6, 18 og 28 og tóku merkilegt nokk þrjá leisktjórnendur og einn skotbakvörð, sem gefur til kynna að eitthvað eigi eftir að skipta, enda stóð það heima að 18. valréttinum var skipt til Denver Nuggets.

Rubio gæti mögulega orðið einn besti leikstjórnandi deildarinnar eftir því sem fram líða stundir, en gæti líka verið verðmætur í leikmannaskiptum, enda er hinn nýliðinn, Jonny Flynn, einnig framúrskarandi leikstjórnandi sem gæti vel stýrt liðinu. Hafa heyrst háværar sögusagnir þess efnis að Mike D‘Antoni, þjálfari NY Knicks hafi mikinn áhuga á að fá Rubio til liðs við sig, sérstaklega þar sem þeim gafst ekki kostur á að velja annan góðan bakvörð Stephen Curry, sem Golden State hrifsaði undan nefinu á þeim.

Brandon Jennings, sem varð frægur og um leið afar umdeildur þegar hann ákvað að sleppa skylduárinu í háskóla og leika þess í stað á Ítalíu, var valinn af Milwaukee tíundi í röðinni, sem mörgum fannst full snemmt því að þrátt fyrir að hann sé mikill íþróttamaður, snöggur og nú kominn með reynslu úr atvinnumennsku, er hann alls ekki góð skytta, en Scott Skiles og félagar í Bucks þykjast greinilega geta gert gott úr því.

Þá komu Indinana Pacers mjög á óvart með því að velja háskólahetjuna Tyler Hansbrough frá Norður Karólínu háskóla með 13. valrétti, en það er mál manna að þótt hann sé einn besti leikmaður síðari ára í háskólaboltanum, dugnaðarforkur og góður gæi, verði hann seint svo mikið sem meðalmaður í NBA vegna þess að hann er ekki góð skytta og dæmigerður millimaður þar sem hann er ekki nógu sterkur til að verjast gegn kraftframherjum og ekki nógu snöggur til að taka á skotframherjum. Þá hafi hann notið þess að dómarar létu hann nær alltaf njóta vafaatriða sem mun ekki gerast í NBA. Hann er hins vegar fullviss um að hann eigi eftir að sanna sig og verður fróðlegt að sjá hvort 13 verði lukkutalan hjá Pacers.

Annars var lítið um óvænar uppákomur í valinu fyrir utamn það að SA Spurs náðu að nappa DeJuan Blair með sjöunda valrétti annarar umferðar, en margir héldu að þessi fílsterki og baráttuglaði framherji færri fyrr, jafnvel í hópi „lotterí-valrétta“ í upphafi fyrstu umferðar. Hnémeiðsli hræddu þó hins vegar mörg lið frá en hann gæti enn sannað sig.

Nú hafa leikmenn og liðin heilt sumar til að finna taktinn. Viðbúið er að einhver skipti fari fram, jafnvel síðar í dag, og verður gaman að sjá hvernig fer.

Sjá listann yfir nýliðavalið 2009 á Yahoo! Sports

Flestallir spekingar vestanhafs eru vissir um að Blake Griffin eigi eftir að eiga gifturíkan feril sem kraftframherji, og geti jafnvel lyft hinu vonlausa liði Clippers upp útr öskustónni. Væntingarnar eru þó varfærnar og varla búist við því að hann verði stjarna, en geti þó gert betri hluti en margir aðrir sem hafa komið á undan honum sem fyrsti valkostur síðustu árin.

Til fróðleiks eru hér fyrstu valréttir síðustu 20 ára sumir hafa þegar skráð sig á spjöld sögunnar, en aðrir mega teljast með verstu ákvörðunum í sögu nýliðavalsins (les. Kwame Brown og Michael Olawokandi):

Ár        Nafn                            Lið                               Skóli

2008    Derrick Rose               Chicago                       Memphis

2007    Greg Oden                   Portland                       Ohio State

2006    Andrea Bargnani          Toronto                       Italy

2005    Andrew Bogut             Milwaukee                   Utah

2004    Dwight Howard           Orlando                       SW Atlanta Christian Academy

2003    LeBron James             Cleveland                     St. Vincent-St. Mary HS

2002    Yao Ming                    Houston                       China

2001    Kwame Brown            Washington                  Glynn Academy

2000    Kenyon Martin            New Jersey Nets         Cincinnati

1999    Elton Brand                 Chicago Bulls               Duke

1998    Michael Olowokandi    LA Clippers                 Pacific

1997    Tim Duncan                 San Antonio                 Wake Forest

1996    Allen Iverson                Philadelphia                  Georgetown

1995    Joe Smith                     Golden State                Maryland

1994    Glenn Robinson           Milwaukee                   Purdue

1993    Chris Webber             Orlando                       Michigan

1992    Shaquille O'Neal          Orlando                       Louisiana State

1991    Larry Johnson              Charlotte                      Nevada-Las Vegas

1990    Derrick Coleman         New Jersey                  Syracuse

1989    Pervis Ellison                Sacramento                  Louisville

Mynd/AP

ÞJ