Haukur Helgi Pálsson og Maryland lönduðu sínum fyrsta sigri í ACC háskólariðlinum í nótt þegar liðið hafði öruggan sigur á Wake-Forest á útivelli. Lokatölur leiksins voru 74-55 Maryland í vil þar sem Haukur Helgi fékk rúman tíma til að spreyta sig.
Haukur kom inn af bekknum og lék í 20 mínútur og náði að skora 4 stig í leiknum, tók 5 fráköst, gaf 2 stoðsendingar og stal 1 bolta. Haukur setti niður 2 af 5 teigskotum sínum, brenndi af einum þrist og lét það vera að þessu sinni að heimsækja vítalínuna.
Sigurinn í nótt var sá fyrsti hjá Maryland í ACC riðlinum en fyrir leik næturinnar hafði Maryland tapað tveimur fyrstu leikjunum sínum í riðlinum svo sigurinn var kærkominn. Hér er hægt að sjá stöðuna og liðin í ACC riðlinum.
