Ari Gunnarsson, þjálfari KR, var nokkuð sáttur með leik síns liðs eftir góðan sigur gegn Haukum í DHL-höllinni í kvöld. KR spilaði virkilega sterkan varnarleik og hélt Haukum t.d. aðeins í 8 stigum í öðrum leikhluta.
"Já, núna ákvað liðið að koma saman og spila liðsbolta og liðsvörn og það hepnaðist mjög vel. Maður vill náttúrulega alltaf byggja á góðum varnarleik og það small í dag, það small ekki í síðasta leik. Svona er þetta bara en að sjálfsögðu, við ætlum að byggja á varnarleik".
Liðin voru fyrir leikinn hnífjöfn með 22 stig í 3-4 sæti deildarinnar og KR er því með þessum sigri að tylla sér í þriðja sætið. Haukar hafa reynst KR erfiðir í vetur og því hefur þessi sigur líklega verið þeim kærkominn.
"það er náttúrulega alltaf gott að vinna, þetta eru búnir að vera skemmtilegir leikir á móti Haukum og Haukarnir eru með mjög gott lið. Að sjálfsögðu er þetta boozt fyrir okkur að vinna svona gott lið eins og Hauka".
