Njarðvík tryggði sér sinn fyrsta bikarmeistaratitil í kvennaflokki með glæstum sigri á Snæfell í Laugardalshöllinni í dag. Njarðvík hafði tröllatak á leiknum og náði mest 18 stiga forskoti í stöðunni 48-66 en Snæfell kom til baka og úr varð æsispennandi leikur. Njarðvíkingar þurftu því að hafa fyrir sigrinum en Lele Hardy reyndist liðinu ótrúlega vel á lokamínútum leiksins.
Fyrir liði Njarðvíkur fóru Lele Hardy og Shanae Baker-Brice sem áttu hreint út sagt stórkostlegan leik báðar tvær. Shanae Baker-Brice var tilnefnd mikilvægasti leikmaður leiksins með ótrúlegar tölur, 35 stig, 16 fráköst, 9 stoðsendingar og 5 stolna bolta. Lele Hardy var ekki langt á eftir henni með 26 stig og 24 fráköst. Petrúnella Skúladóttir átti einnig mjög góðan dag í liði Njarðvíkur með 18 stig. Í liði Snæfells var Kieraah Marlow atkvæðamest með 37 stig en næstar voru það Jordan Lee Murphree með 15 stig, 15 frákost og 5 stoðsendingar og Hildur Sigurðardóttir með 13 stig, 6 fráköst og 6 stoðsendingar.
Snæfell setti upp í aggressíva svæðisvörn strax frá fyrstu mínútum leiksins og Njarðvík endaði því flestar sóknir á upphafsmínútunum á skoti nokkuð fyrir utan þriggja stiga línuna. Það var ekki fyrr en eftir rúmar þrjár mínútur og í sjöttu tilraun sem það borgaði sig. Snæfell tókst þó ekki að nýta sér þennan varnarleik því þegar fyrsti leikhluti var hálfnaður var hnífjafnt, 8-8. Njarðvík lærði svo fljótt að finna sér leiðir framhjá vörn Snæfellinga og höfðu náð 4 stiga forskoti þegar tæpar þrjár mínútur voru eftir af fyrsta leikhluta, 12-16. Snæfell var bókstaflega að gefa Njarðvíkingum boltan trekk í trekk með því að blaka fráköstum til þeirra eða hreinlega að gleyma að fara upp í fráköstin. Ingi Þór Steinþórsson tók því leikhlé og las yfir sínu liði. Liðið virtist aðeins taka við sér og þegar fyrsta leikhluta lauk munaði þremur stigum á liðunum, 19-22. Lele Hardy og Shanae Baker fóru hreinlega á kostum í fyrsta leikhluta og hirtu samanlagt 14 fráköst og settu 14 stig en Snæfells liðið eins og það leggur sig tók aðeins 11 fráköst í fyrsta leikhluta.
Ekki skánuðu hlutföllin í frákastabaráttu leiksins Snæfelli í hag í öðrum leikhluta en þegar þrjár mínútur voru liðnar höfðu Njarðvíkingar tekið 24 fráköst á móti 12 fráköstum Snæfells, sóknarfráköst Njarðvíkur voru 13 af þessum 24. Njarðvík var þó ekki að nýta sér þau tækifæri sem skildi og höfðu þá aðeins þriggja stiga forksot 26-29. Snæfell hafði jafnað leikinn þegar annar leikhluti var hálfnaður 31-31. Það var þó alltaf Njarðvík sem hafði frumkvæðið og um tveimur mínútum seinna höfðu þær náð 4 stiga forskoti á ný, 31-35. Ingi Þór Steinþórsson tók þá leikhlé fyrir Snæfell. Snæfell jafnaði svo leikinn stuttu seinna og komust yfir, 36-35, í fyrsta skiptið síðan í stöðunni 6-5. Alda Leif Jónsdóttir fékk að setjast á bekkinn þegar rúm mínúta var eftir að fyrri hálfleik þegar hún fékk sína þriðju villu. Það var hins vegar Njarðvík sem fór með forskotið inní hálfleikinn, 38-41.
Stigahæst í liði Njarðvíkur í hálfleik var Shanae Baker með 24 stig og 8 fráköst en næstar voru Petrúnella Skúladóttir og Lele Hardy með 8 stig hvor. Hardy hafði þó tekið 16 fráköst sem fróðir menn ættu að fletta upp í sögubókunum því annað eins hefur líklega ekki sést. Í liði Snæfells var Kieraah Marlow stigahæst með 24 stig en næstar voru Hildur Sigurðardóttir með 7 stig, 4 fráköst og 4 stoðsendingar og Hildur Björg Kjartansdóttir með 4 stig.
Njarðvík var eina liðið sem mætti til leiks á fyrstu mínútu seinni hálfleiks en þær skoruðu fyrstu 7 stig leikhlutans og höfðu náð 10 stiga forskoti, 38-48. Alda Leif Jónssdóttir fékk slæma byltu þegar þrjár mínútur voru liðnar af þriðja leikhluta og þurfti að gera nokkuð hlé á leiknum á meðan hún fékk þá aðstoð sem hún þurfti. Njarðvík gaf ekkert eftir og þegar þriðji leikhluti var hálfnaður höfðu þær náð 16 stiga forskoti, 44-60 og Ingi Þór Steinarsson tók leikhlé fyrir Snæfell. Petrúnella og Hardy skelltu tveimur þristum á Snæfellingana á stuttum tíma og kom þeim í 18 stiga forskot, 48-66. Snæfell tók þá góðan kafla og skoraði næstu 8 stig leiksins þangað til Sverrir Sverrisson tók leikhlé fyrir Njarðvík, 56-66. Snæfell pressuðu boltan hátt og tókst að trufla sóknarleik Njarðvíkur nokkuð. Þegar flautað var til loka þriðja leikhluta höfðu Njarðvíkingar 8 stiga forskot, 58-66.
Snæfell galopnaði leikinn í upphafi fjórða leikhluta og skoruðu fyrstu 4 stigin og munaði því aðeins fjórum stigum á liðunum þegar rúmlega tvær mínútur voru liðnar af leikhlutanum, 62-66. Njarðvík stóðs þó áhlaupið og höfðu náð forskotinu aftur upp í 7 stig þegar fjórði leikhluti var hálfnaður, 67-74. Ingi Þór Steinþórsson tók þá leikhlé. Snæfell var stuttu seinna búið að minnka muninn aftur niður í 3 stig, 71-74 og spennan í höllinni farin að magnast. Stuðningsmenn Snæfells stóðu svo allir á lappir þegar Jordan Lee Murphree minnkaði muninn niður í 1 stig, 73-74. Það var hins vegar Lele Hardy sem steig upp fyrir Njarðvík og skoraði 5 stig í röð ásamt því að stela boltanum þegar 1 mínúta og 21 sekúndar var eftir, 75-81. Njarðvíkingar spiluðu klukkuna í næstu sóknum og tóku þá áhættu að taka erfið skot þegar skotklukkan var að klárast. Snæfell náði því að minnka muninn í 4 stig, 77-81, þangað til að Sverrir Þór Sverrisson tók leikhlé fyrir Njarðvík en þá voru 18 sekúndur eftir af leiknum og Shanae Baker-Brice á vítalínunni. Hún nýtti bæði vítin og höllin var staðin á fætur. Snæfell tókst ekki að nýta næstu sókn og aftur var Baker send á línuna þar sem hún tryggði Njarðvík sér sinn fyrsta bikarmeistaratitil í körfuknattleik kvenna, 77-84.
Karfan.is óskar körfuknattleiksdeild Njarðvíkur og Njarðvíkurliðinu innilega til hamingju með fyrsta bikarmeistaratitil kvenna í sögu Njarðvíkur!
Mynd: [email protected]
Umfjöllun: [email protected]
