Hvíldir Spurs lögðu Memphis

Tíu leikir fóru fram í NBA deildinni í nótt þar sem Miami Heat hafði betur gegn Brooklyn Nets og liðið sem komst í fréttirnar í vikunni fyrir að hvíla heilt byrjunarlið, San Antonio Spurs, hafði betur Memphis Grizzlies eftir framlengdan slag.

 

Dwyane Wade var stigahæstur hjá Miami með 34 stig og 7 stoðsendingar og LeBron James bætti við 21 stigi, 9 fráköstum og 6 stoðsendingum. Hjá Brooklyn var Andray Blatche atkvæðamestur með 20 stig og 8 fráköst og Deron Williams gerði 10 stig og gaf 12 stoðsendingar.

 

Liðsmenn Spurs mættu hvíldir í leikinn en félagið 250.000 dollurum fátækari þar sem David Stern sektaði Gregg og félaga fyrir að hvíla byrjunarliðsmenn sína í leiknum gegn Miami. Herbragðið hjá Gregg virtist hafa tilætluð áhrif því Spurs unnu leikinn gegn sjóðheitum Grizzlies eftir framlengingu. Tony Parker fór fyrir Spurs með 30 stig, 4 fráköst og 6 stoðsendingar og Tim Duncan bætti við 27 stigum og 15 fráköstum. Hjá Grizzlies var Marc Gasol með 20 stig og 8 fráköst og Mike Conley gerði 18 stig og gaf 12 stoðsendingar. Jafnt var í stöðunni 87-87 og þurfti að framlengja en Spurs unnu framlenginguna 12-8.