Skallagrímsmenn geta kæst um stund því Páll Axel Vilbergsson verður í leikmannahópi liðsins í kvöld þegar KR mætir í heimsókn í Fjósið í lokaumferð Domino´s-deilarinnar fyrir jól. Þá verður Hörður Helgi Hreiðarsson einnig í búning.
Páll Axel hefur verið að glíma við meiðsli og verið mikið fjarverandi í liði Skallagríms undanfarið. Páll hefur aðeins leikið 6 deildarleiki með Skallagrím en gert í þeim 19,8 stig og tekið 6,3 fráköst að meðaltali í leik. Hörður Helgi Hreiðarsson hefur leikið tvo leiki með Borgnesingum þessa vertíðina og gerði í þeim 5,5 stig og tók 3,5 fráköst.
Þá sagðist Pálmi Þór Sævarsson þjálfari Skallagríms vonast til þess að Egill Egilsson fengi að hefja æfingar með liðinu um jólin.
