Miami lagði Dallas í framlengingu

NBA deildin bauð upp á heljarinnar veislu í nótt, hvorki fleiri né færri en 12 leikir voru á dagskránni þar sem meistarar Miami mörðu Dallas eftir framlengdan spennuslag. Clippers fengu skell og töpuðu þar með sínum öðrum leik í röð og Toronto kjöldró Portland sem í gær náði í sterkan útisigur gegn New York.

 

LeBron James fór mikinn í liði Miami og vantaði bara eina stoðsendingu upp á þrennuna með 32 stig, 12 fráköst og 9 stoðsendingar. Tölurnar hjá Dwyane Wade voru heldur ekkert slor, 27 stig, 10 fráköst og 5 stoðsendingar. Hjá Dallas var O.J. Mayo með 30 stig, 3 fráköst og 6 stoðsendingar. Dirk Nowitzki er enn að koma inn af bekknum en lék í tæpar 30 mínútur og gerði 19 stig og tók 6 fráköst. Framlengja varð leikinn í stöðunni 103-103 eftir að ,,Dirkarinn” hafði jafnað metin með einu af sínu víðfrægu ,,úr jafnvægi” teigskotum. Heat reyndust svo mun sterkari í framlengingunni og unnu hana 16-6!