LeBron yfir 20.000 stig

LeBron James varð í nótt yngsti leikmaðurinn í sögu NBA deildarinnar til þess að rjúfa 20.000 stiga múrinn! Það gerði kappinn í sigri meistara Miami á útivelli gegn Golden State Warriors. Lokatölur 75-92 fyrir Miami þar sem LeBron gerði 25 stig.

 

Sem fyrr var ,,King” James að daðra við þrennuna því hann var einnig með 10 stoðsendingar í leiknum og 7 fráköst. Mario Chalmers og Dwyane Wade bættu svo báðir við 15 stigum. Hjá Golden State var Jarrett Jack stigahæstur með 16 stig og 3 fráköst.

 

Mark Jackson þjálfari Golden State var aðeins að hrista upp í LeBron fyrir leik og óskaði honum til hamingju með að rjúfa 20.000 stigin… í næsta leik! LeBron beið ekki boðanna og kláraði þetta í nótt. Nú, ef 20.000 stig voru ekki nóg þá náði LeBron einnig öðru marki en það er að gefa 5000 stoðsendingar, sú fimmþúsundasta kom þegar hann fann Wade í teignum sem kláraði með myndarlegri troðslu.