Toppslagur í Hólminum

Í kvöld lýkur þrettándu umferð í Domino´s deild karla en þá eru fimm leikir á dagskrá. Þrettaánda umferð hófst um síðustu helgi þegar KFÍ vann sterkan útisigur í Grafarvogi. Flestra augu beinsta svo væntanlega að viðureign Snæfells og Grindavíkur sem fram fer í Stykkishólmi en liðin eru á toppi deildarinnar ásamt Þór Þorlákshöfn og Stjörnunni, öll fjögur liðin með 18 stig.

 

 

Njarðvík-Skallagrímur

Þór Þorlákshöfn-ÍR

Snæfell-Grindavík

Keflavík-Stjarnan

Tindastóll-KR

 

Athyglisverður leikur hér á ferðinni, Njarðvíkingar geta jafnað Skallana að stigum með sigri í kvöld, Skallagrímur er í 7. sæti deildarinnar með 10 stig en Njarðvík í 8.-10. sæti með 8 stig en hefur betur innbyrðis gegn Fjölni og KFÍ. Skallagrímur hefur tapað síðustu fjórum heimaleikjum sínum og Njarðvík síðustu þremur heimaleikjum sínum. Bæði lið lágu í síðustu umferð, Skallagrímur gegn KFÍ og Njarðvík gegn Þór Þorlákshöfn. Þegar liðin mættust í Borgarnesi var háspenna í boði þar sem Skallarnir mörðu sigur í blálokin. Hér eru tvö dýr stig á ferðinni.

 

Þórsarar eru komnir aftur á sigurbraut eftir sigur í Njarðvík í síðustu umferð en ÍR hefur tapað síðustu fjórum deildarleikjum og eru í fallsæti, 11. sæti, með 6 stig. Þórsarar mörðu fyrri viðureign liðanna á tímabilinu 92-95 en töpuðu síðasta heimaleik í deild og vilja eflaust komast þar aftur á rétta braut fyrir framan sitt fólk!

 

Liðin mættust í annarri umferð í Grindavík þar sem Íslandsmeistararnir höfðu betur, 110-102. Allar forsendur eru fyrir því að þessi skrímslaleikur verði framlengdur og allt í járnum, við getum amk vonað það enda vantar ekki fallbyssurnar í þessa hópa. Verður forvitnilegt að sjá hvor hafi betur fyrir utan þriggja stiga línuna, Jón Ólafur eða Sammy Zeglinski. Snæfell tapaði síðasta heimaleik í deild og hið sama gildir fyrir Grindavík, bæði lið létu taka sig í bólinu á heimavelli og Hólmarar eiga kost á því að bæta sínu fólki það upp í kvöld en mæta þó Grindavík sem unnið hefur síðustu þrjá útileiki sína, þetta verður ruuusalegt.

 

Garðbæingum er s.s. vorkunn að mæta í Toyota-höllina í kvöld eftir að Keflvíkingar lögðu Grindavík í Röstinni og það fyrstir liða þetta tímabilið. Kassinn er úti á Keflvíkingum í dag og væntanlega ekki síður á Garðbæingum sem unnið hafa þrjá síðustu deildarleiki sína. Keflavík fékk skell í fyrri umferðinni í Garðabæ, 101-83, og verða að galdra fram einstakan leik ef þeir ætla að ná innbyrðisviðureigninni til baka gegn Stjörnunni. Leikurinn verður í beinni netútsendingu á Sport TV.

 

Stólarnir berjast nú fyrir lífi sínu í deildinni, þeim dugir ekkert annað en sigur í kvöld til að hefja vegferðina á beinu brautinni en þá er einmitt heitasta lið deildarinnar í heimsókn. KR hefur unnið fjóra síðustu deildarleiki sína og sitja í 5. sæti með 16 stig en 5. sætið er í dag hið raunverulega annað sætið um þessar mundir þar sem fjögur lið eru jöfn á toppi deildarinnar.