Bein textalýsing: Ísland-Finnland U16 kvenna

– Leik lokið: Ísland 70-59 Finnland. Öflugur íslenskur sigur.

– Finnar drippla út af vellinum þegar 51 sek er eftir og brjóta strax, Ísland er á leið á línuna…þetta er komið gott fólk, þriðji sigur U16 ára kvennaliðsins er á leið í land.

– 58,6 sek eftir þegar Emelía Ósk setur niður eitt víti og kemur Íslandi í 67-57 og þar með er björninn unninn!

– 66-57 Sylvía Rún með gríðarlega mikilvæga körfu, smá klafs í teignum og boltinn barst til hennar og hún afgreiddi hann í körfuna þegar 1.06mín eru til leiksloka, þessi gæti hafa farið langt með leikinn! Finnar taka leikhlé.

– 63-54 Emelía Ósk setur niður tvö víti og búin að gera fjögur íslensk stig í röð. 2.40mín eftir.

– 61-54 glæsilegt samspil hjá Sylvíu og Emelíu þar sem Emelía afgreiðir tvö góð stig í teignum. 3.23mín eftir og Finnar taka leikhlé.

– 59-54 Inga Rún Svansdóttir skorar fyrstu stig Íslands í fjórða leikhluta, eykur muninn í 5 stig, það þurfti að bíða lengi eftir þessum stigum, vel gert hjá Ingu Rún í finnska teignum.

– Inga Rún með glæsilega varið skot en dæmd villa og íslensku áhorfendurnir ganga af göflunum…já það vantar ekki hamaganginn hér í Vasalund, það er allt á suðupunkti.

– 57-54 og 6.35mín eftir…Ísland enn ekki búið að skora í leikhlutanum. Mæðir mikið á Sylvíu Rún núna á lokasprettinum, Ísland verður að ógna úr fleiri áttum en frá Sylvíu, að öðrum kosti er íslenska liðið bara að auðvelda Finnum varnarvinnuna.

– 7.46mín eftir af leiknum og Ísland enn ekki búið að skora í fjórða, bæði lið farin að pústa vel. Staðan enn 57-53 fyrir Ísland.

– 57-53 Finnar opna með þrist, þessi fjórði leikhluti verður rosalegur!

– Fjórði leikhluti er hafinn og Ísland byrjar með boltann.

– 55-46 og ein og hálf mínúta eftir af þriðja leikhluta sem hefur verið hnífjafn, staðan er 14-14 í leikhlutanum.

– 55-42 og 2.30mín eftir af þriðja leikhluta. Hörku barátta en Ísland er við stýrið, okkar dömur eru enn í vandræðum gegn finnsku pressunni en til þessa hefur það ekki valdið neinum breytingum á því að Ísland er við stýrið.

– 52-38 Sylvía fer enn eina ferðina galvösk inn í finnska teiginn og skorar. Komin með 26 stig og fagnar hverri körfu sem sigurkörfu, sú er hátt stemmd! 

– 50-38 Björk Gunnarsdóttir eykur muninn í tólf stig með töffara-gegnumbroti, virkilega vel gert við erfiðar aðstæður.

– 46-38 og miðherji Finna, hin hávaxna Tulonen fær sína fjórðu villu sem veit á gott fyrir íslenska liðið því hún hefur reynst okkur erfið til þessa í leiknum.

– 44-38 Finnar með 6-0 áhlaup og Jón Guðmundsson tekur leikhlé fyrir íslenska liðið.

– 44-32 Elfa setti annað vítið.

– 43-32 Inga Rún opnar síðari hálfleik með tveimur vítum fyrir íslenska liðið og nú skömmu síðar er Elfa Falsdóttir á leið á línuna. Ísland farið að ráðast aftur af krafti á finnska teiginn.

– Síðari hálfleikur er hafinn.

Annar leikhluti

– 39-30 fyrir Ísland, laglega gert hjá Emelíu Ósk sem brunaði upp endalínuna og kláraði vel, mikill íþróttamaður hér á ferðinni.

– 37-28 og 2.34mín til hálfleiks. 

– Thelma Dís fær tvö víti, pumpaði laglega upp finnskan varnarmann og sótti þar villu, brennir af báðum vítum en gabbhreyfingin framkvæmd af yfirvegun í traffík í teignum, flott og útsjónarsamt hjá þessum unga og efnilega leikmanni, setur bara vítin næst.

– 37-24 Sylvía Rún setur niður tvö víti og komin í 20 stig. Magnað að fylgjast með stelpunni hérna.

– 5.17mín til hálfleiks og flottur íslenskur sprettur og Finnar taka leikhlé í stöðunni 35-22 en Inga Rún var enda við að skora eftir hraðaupphlaup.

– 30-22 þá losnaði loks um stífluna, Sylvía Rún með körfu í finnska teignum  og strax í næstu sókn fylgir þristur frá henni, staðan 33-22 og Sylvía komin með 18 af 33 stigum íslenska liðsins.

– Nú eru fjórar mínútur liðnar af öðrum leikhluta og staðan 28-20 fyrir Ísland og verið var að dæma tæknivíti á Ísland fyrir mótmæli af bekknum úr röðum þjálfara. Gengur allt upp hjá Finnum þessa stundina. Íslenska liðið þarf að ná áttum á nýjan leik og venjast því að spila gegn ákafri vörn Finna.

– 28-18 og Finnar byrjar 6-0. Þær finnsku eru grimmar í vörninni og íslenska liðið ekki jafn duglegt að ráðast á teiginn. Gríðarleg barátta í leiknum.

– 28-16 og Sylvía komin aftur inn í íslenska liðið, fór útaf á síðustu sekúndum fyrsta leikhluta. Henni gengur vel að koma upp með boltann gegn pressu Finna. Tvær mínútur liðnar af leikhlutanum og íslenska liðið enn ekki búið að skora. 

– 28-14 Finnar opna annan leikhluta með tveimur vítum.

– Annar leikhluti er hafinn, Ísland byrjar með boltann.

– Hafnarfjarðarmærin Sylvía er dottin í ham, enn eina ferðina þræddi hún finnska teigin, fékk villu og skoraði að auki og kemur Íslandi í 28-12, Sylvía komin með 13 stig en hún er líka með tvær villur og verður að fara varlega.

– 23-10 Björk Gunnarsdóttir með góðan þrist fyrir Ísland eftir stoðsendingu frá Sylvíu Rún sem strax í næstu sókn prjónar sig í gegnum finnsku vörnina og breytir stöðunni í 25-12, Sylvía í svakalega flottum gír! 

– 20-10 Thelma Dís skorar af harðfylgi í finnska teignum. Íslensku bakverðirnir láta finnsku pressuna flækjast nokkuð fyrir sér þessar síðust mínútur í fyrsta leikhluta, eru svona að átta sig á því hvernig sé best að leysa úr þessum hamagangi í Finnum.

– 18-7 Finnar með þrist og komnir mun ofar á völlinn, freista þess að setja íslensku bakverðina í vandræði og reyna að halda boltanum frá Emelíu Ósk og Sylvíu Rún því þegar þær fara af stað standa Finnar eftir ráðalausir. 

– 14-2 Emelía Ósk með stolinn, brunar fram og skorar og þar strax í kjölsogið kemur Sylvía Rún með stolinn og skorar og breytir stöðunni í 16-2. Þvílíkar bombur þessar stelpur, Finnar vita vart hvaðan á sig stendur veðrið.

– 8-2 Emelía Ósk fær tvö víti sem hún setur niður en brotið var á henni eftir sóknarfrákast, Emelía fer vel af stað í dag, komin með 5 stig og 2 fráköst og lætur sem fyrr vel til sín taka í varnarleiknum.

– 6-2 Sylvía Rún setur niður tvö víti fyrir Ísland, flott barátta í íslenska liðinu strax frá fyrstu sekúndu.

– 1-0 Thelma setur annað vítið, skömmu síðar brunar 

– Leikur hafinn og það er Thelma Dís sem fer á línuna…

– Nú eru rúmar fimm mínútur til leiks og liðin gera sig klár í að hlýða á þjóðsöngvana.