Spánn, Grikkland, Slóvenía og Bandaríkin ósigruð

Risavaxinn dagur er að baki á heimsmeistaramótinu á Spáni en í dag voru alls tólf leikir á dagskránni. Rétt eins og eftir gærdaginn eru enn fjögur lið sem hafa ekki tapað leik en það eru Spánn, Grikkland, Bandaríkin og Slóvenía. Spánverjar skelltu Frökkum örugglega í lokaleik kvöldsins, 88-64. Finnar máttu svo þola ósigur gegn Tyrkjum eftir framlengdan spennuslag, lokatölur 77-73 Tyrki í vil.

 

 

Ástralir unnu sinn þriðja leik í röð á mótinu eftir tíu stiga tap í fyrsta leik gegn Slóvenum. Gustavo Ayon leikmaður Atlanta Hawks var stigahæstur í liði Mexíkóa með 11 stig og 9 fráköst en Aron Bynes leikmaður San Antonio Spurs gerði 21 stig og tók 5 fráköst fyrir Ástrali.

 

Andray Blatche átti stórleik fyrir Filippseyinga með 25 stig og 14 fráköst en það dugði ekki til og fjórir ósigrar í röð því staðreynd. Hjá Púertó Ríkó var Jose Barea leikmaður Minnesota Timberwolves með 30 stig og 5 fráköst.

 

„Tall Blacks“ lönduðu sínum fyrsta sigri á mótinu og með þessum sigri settu þeir Finna á botn C-riðils sem töpuðu í framlengingu gegn Tyrkjum í kvöld. Kirk Penney leikmaður Trabzonspor í Tyrklandi var stigahæstur Nýsjálendinga með 17 stig og 7 fráköst en Maxym Kornienko gerði 15 stig og tók 4 fráköst fyrir Úkraínumenn.

 

Youssef Shousha var með 15 stig og 3 fráköst í liði Egypta en hjá Írönum var Samad Nikkhah Bahrami með 24 stig og 6 stoðsendingar. Þrátt fyrir sigur Írana í kvöld eru þeir á botni A-riðils ásamt Egyptum en Egyptar hafa enn ekki fundið sigur á Spáni þetta mótið.

 

Domen Lorbek var stigahæstur Slóvena með 17 stig og 4 stoðsendingar en hjá Angólum var Roberto Fortes með 21 stig og 3 fráköst. Þar með eru Slóvenar með fjóra sigra í röð á HM og tróna á toppi D-riðils en Angólar eru í fallsæti ásamt Kóreu en eiga leik upp á að hlaupa.

 

Stuðið í Senegal var jafnað við jörðu í dag. Risa skellur gegn sterkum Argentínumönnum og skildu leiðir liðanna strax í öðrum leikhluta sem Argentína vann 21-9. Fjórði leikhluti fór svo 28-8 fyrir Argentínu og Senegalar sem höfðu unnið tvo leiki og tapað einum fyrir leikinn gegn Argentínumönnum heldur betur rassskelltir. Luis Scola fór illa með Senegala, skellti á þá 22 stigum og reif í sig 14 fráköst. Hjá Senegal var Gorgui Dieng leikmaður Minnesota með 11 stig og 8 fráköst.

 

Fjölmennastir á pöllunum en þetta ætlar ekki alveg að hafast hjá frændum okkar Finnum. Súrt tap í dag gegn Tyrkjum eftir framlengdan leik og Finnar á botni C-riðils ásamt Nýsjálendingum en eiga leik gegn Nýsjálendingum á morgun. Sigur og ekkert annað hjálpar Finnum að halda áfram í keppninni en útlitið er ekki gott um þessar mundir. Petteri Koponen var atkvæðamestur Finna í dag með 17 stig, 5 fráköst og 5 stoðsendingar en hjá Tyrkjum var Ömer Asik leikmaður Houston Rockets með 22 stig og 8 fráköst.

 

Serbar skitu á bitann í fjórða leikhluta sem Brassar unnu 21-9 og leikinn 81-73. Marquinhos Vieira var atkvæðamestur Brassanna með 21 stig og 5 fráköst en hjá Serbum var Milos Tedosic með 14 stig og 5 stoðsendingar. Brasilía er í 2. sæti A-riðils með 3 sigra og einn tapleik og þar á eftir í 3. sæti koma Serbar með 2 sigra og tvo tapleiki rétt eins og Frakkland en næsti leikur Serba er gegn Spáni og næsti leikur Frakka er gegn Íran.

 

Adas Juskevicius gerði 20 stig stig í liði Lithá og tók einnig 3 fráköst en hjá Kóreumönnum var Taejong Moon með 20 stig. Kóreumenn hafa tapað öllum fjórum leikjunum sínum til þessa og eiga einn leik eftir gegn Mexíkó.

 

Kostas Papanikolaou leikmaður Barcelona og Kostas Kaimakoglu leikmaður Uniks Kazan í Rússlandi voru báðir með 14 stig í gríska liðinu í dag. Hjá Króötum var Nets-leikmaðurinn Bojan Bogdanovic með 20 stig og 4 fráköst.

 

Fjórði sigurleikur Bandaríkjamanna í röð og að þessu sinni var Kenneth Faried leikmaður Denver Nuggets stigahæstur með 16 stig og 6 fráköst. Hjá Dóminíska lýðveldinu var Victor Liz með 15 stig og 3 fráköst. Síðasti leikur Bandaríkjanna í riðlinum er gegn Úkraínumönnum sem eru í 2. sæti með tvo sigra og tvo tapleiki rétt eins og Tyrkir.

 

Marc Gasol fór fyrir Spánverjum í kvöld með 17 stig og 6 fráköst og bróðir hans Pau var ekki langt undan með 15 stig og 4 fráköst. Hjá Frökkum voru Batum og Diot báðir með 11 stig.