Hörður Axel Vilhjálmsson gerði 22 stig í dag fyrir Mitteldeutscher BC í þýsku úrvalsdeildinni þegar liðið hafði gríðarlega sterkan sigur á BG Göttingen. Lokatölur voru 91-86 fyrir MBC þar sem Hörður Axel skellti niður risavöxnum þrist þegar 24 sekúndur voru til leiksloka en þá kom hann MBC í 89-86.
Hörður var einnig með 3 fráköst og 3 stoðsendingar í leiknum en stigahæstur hjá MBC þennan leikinn var Frantz Massenat með 31 stig.
MBC er í 12. sæti þýsku deildarinnar með 14 sigra og 19 tapleiki en Göttingen í 9. sæti með 16 sigra og 17 tapleiki.