Stefnan sett á alla titlana sem eru í boði

Helena Sverrisdóttir, spilandi þjálfari Hauka er hvergi bangin í upphafi leiktíðar og segir stefnuna vera setta á alla titla sem í boði eru. Einn þeirra er nú þegar kominn í hús eða Lengjubikarinn, eftir öruggan sigur á Keflavík.

Leikmannahópurinn:

Komnar: 
Helena Sverrisdóttir, Pálína Gunnlaugsdóttir, Jóhanna Sveinsdóttir, Eva Margrét Kristjánsdóttir
Farnar: 
Guðrún Ámundadóttir, Dagbjört Samúelsdóttir.

Hvernig hefur undirbúningur liðsins gengið í sumar og upp á síðkastið? 
Undirbúningurinn hefur gengið nokkuð vel. Margir leikmenn voru í landsliðsverkefnum í sumar en síðan byrjuðum við á fullu á byrjun ágúst. Við fórum í keppnisferð til Danmerkur um miðjan september og mættum toppliðunum þar sem gerði okkur mjög gott. Við erum á góðu róli núna, áttum ágætisleiki í Lengjunni en ennþá fullt af plássi fyrir bætingar. 

Komandi tímabil og væntingar þjálfara og liðsins til þess? 
Við erum mjög spennt fyrir tímabilinu og þorum alveg að gefa það út að stefnan er sett á alla titlana sem eru í boði. Við erum með mjög breiðan æfingahóp og höfum mikla og holla samkeppni á æfingum sem á eftir að hjálpa okkur. 

Hvaða lið telur þú sterkust í dag fyrir mót?
Það er alltaf svo erfitt að segja þar sem að erlendur leikmaður í liðunum getur breytt svo miklu í þessari deild. En við, Keflavík, Valur, Stjarnan og síðan Grindavík þegar þær eru orðnar heilar býst ég við að verði í toppbaráttunni. Ekki hægt að afskrifa Íslandsmeistarana, en þegar þær verða heilar þá gætu þær vel komist inn í þessa baráttu.