FSu er fjarri því að vera besta varnarlið deildarinnar og þar var engin breyting á í kvöld. Þessi leikur í kvöld gekk út á að skora meira en andstæðingurinn en stressa sig minna á því að hindra það að hann skoraði á móti. Fór svo að Snæfell skoraði meira og fór heim með sigurinn 97-110 og tvö mikilvæg stig.
FSu fór vel af stað í leiknum. Boltinn gekk vel, liðið hitti og barðist grimmt í fráköstunum. Snæfell var lengur í gang en í 2. hluta snérust hlutverkin alveg við. Snæfell negldi niður hverju þristinum á fætur öðrum og voru 7/10 fyrir utan þriggja stiga línuna í 2. hluta, en 13/17 í heildina. Snæfell fékk mikið af opnum skotum en mörg þeirra vegna dapra samskipta FSu í vörn. Snæfell skoraði tæplega 2 stig í sókn eða 1,96 sem er ekki góð einkunn fyrir FSu vörnina.
51-55 var staðan í hálfleik og ljóst að mikið yrði skorið í leiknum ef varnarleikurinn héldi svona áfram. Svo varð á en bæði lið hittu afbragðsvel í 3. hluta og menn að hvíla sig í vörn. Snæfell jók muninn í 8 stig fram að lokum 3. hluta.
Á síðustu 10 mínútum leiksins var uppgjöfin alger hjá heimamönnum og þeir farnir að sætta sig við erfið skot héðan og þaðan á vellinum. FSu reyndi aðeins 5 skot í teignum í fjórða hluta og skoraði úr 3 þeirra. Þrátt fyrir að hafa skorað 36 stig í teignum fram að því. Snæfell notaði teiginn mun betur og skoraði 48 stiga sinna þar.
Hraður leikur og laus við allan varnarleik endaði með sigri Snæfells 97-110. Skilvirkni beggja liða var mikil í sókn eða á bilinu 1,2-1,3 stig per sókn eins og við er að búast þar sem varnarleikur er ekki spilaður. Ætli FSu sér áframhaldandi líf í þessari deild verður liðið að fara að spila vörn. Sóknarleikurinn er ekki vandamál hjá þeim.
Sherrod Wright átti góðan leik fyrir Snæfell með 35 stig, 16 fráköst og 6 stoðsendingar. Sigurður Þorvaldsson átti frábæran leik, nýstiginn upp úr veikindum, með 14 stig og 3/7 í þristum. Hjá FSu var nýjasti leikmaður þeirra Chris Woods stigahæstur af bekknum með 34 stig og 9 fráköst. Chris Caird átti einnig góðan leik með 21 stig, 10 fráköst og 5 stoðsendingar.
Mynd úr safni: Sherrod Wright var drjúgur fyrir Snæfell í kvöld. (Þorsteinn Eyþórsson)
