Leikir dagsins: KR tekur á móti Haukum

Fjórir leikir verða leiknir í Domino's deild karla í kvöld. Haukar, sem hafa tapað báðum leikjum sínum eftir áramót, fá tækifæri til að láta ljós sitt skína gegn Íslandsmeisturunum á þeirra heimavelli. Þetta er jafnframt fyrsta heimsókn Finns Atla aftur í DHL höllina eftir að hann skipti yfir til Hauka sl. sumar. Leikurinn verður í beinni útsendingu á KRtv.is.

Tindastóll tekur á móti Þór Þorlákshöfn í Síkinu en þar er mikilvægur leikur á ferðinni fyrir bæði lið. Þau eru jöfn að stigum í töflunni með 7 sigra hvort. Tindastóll hefur aðeins tapað einum leik í Síkinu í vetur og verður því við ramman reip að draga fyrir gestina. Leikurinn verður í beinni útsendingu á Tindastoll.is.

Grindavík fær ÍR-inga í heimsókn en Breiðhyltingar hafa verið að taka sig saman í andlitinu eftir slæma byrjun. Nú reynir á þá að sýna fram á að árangurinn undanfarið sé ekki tilviljun ein. Grindvíkingar eru aftur á móti óvænt í mikilli botnbaráttu, jafnir ÍR að stigum. Gríðarlega mikilvægur leikur fyrir Grindavík hér á ferðinni.

FSu fær svo Stjörnuna í heimsókn en það verður erfiður leikur fyrir heimamenn því Stjarnan er á mikilli siglingu eftir stóra sigra á KR og Tindastól í fyrstu tveimur leikjum ársins. FSu hins vegar koma beint úr slæmu tapi gegn ÍR í Hellinum og mikilvægt fyrir þá að snúa þeirri þróun við sem fyrst. 

Í 1. deild karla mætast ÍA og Hamar á Akranesi. Tvö lið sem eru jöfn að stigum fyrir miðri töflu og því mikilvægt að Akurnesingar verji heimavöllinn í þessum leik. 

Allir leikir hefjast kl. 19:15 í kvöld.