ÍR-ingar stóðu í Þór Þorlákshöfn í Hellinum í kvöld en Þórsarar fóru hins vegar með stigin 2 heim. Einar Árni Jóhannsson, þjálfari Þórs sagðist þó vita að hann fengi ekkert gefins í Hellinum nema faðmlagið frá Óla Belló, húsverði í Seljaskóla.
"Já, þeir voru flottir í kvöld enda mikilvægur leikur fyrir bæði lið," sagði Einar. "Þeir voru alla vega mun erfiðari andstæðingur fyrir okkur í dag heldur en í fyrri hlutanum. Ég tel það klárt að þeir hafa eflst á nýju ári."
En hvað vantaði hjá Þór?
"Við vorum góðir varnarlega í dag fyrir utan annan leikhluta en sóknarlega höfum við oftast verið betri en í dag. Fundum einhvern veginn aldrei okkar takt en kredit á vörn ÍR að sama skapi. Þeir voru fastir fyrir í dag."
Þetta eru væntanlega hlutir sem verða komnir í lag fyrir Laugardalshöllina eftir viku?
"Stefnum á að gera betur strax á sunnudag er Stjarnan kemur í heimsókn. Eitt skref í einu þessa dagana!"
Mynd: Bára Dröfn
