Samkvæmt öruggum heimildum þá voru þeir Keflvíkingar hársbreidd frá því að kvitta undir samning við Jamario Moon fyrrum NBA leikmann sem lék síðast með Charlotte Bobcats árið 2012. Moon sem í dag er orðinn 36 ára gamall ákvað þó á síðustu stundu að semja við lið í Puerto Rico þar sem hann leikur í dag með liði Indigo de Mayaguez. Moon hefði þá átt að koma í stað Earl Brown jr. sem var látinn taka poka sinn en Jerome Hill kom í hans stað.
Moon spilaði frá árinu 2007 til 2012 í NBA deildinni með 5 liðum. Hann var þekktur fyrir mikinn stökkkraft og á þær nokkrar ansi huggulegar troðslurnar úr NBA deildinni. Síðan Moon hætti í NBA deildinni hefur hann spilað í Grikklandi, Venezuela ásamt nokkrum stöðum en sagan segir að hann "rúnti" nú um heiminn í ævintýramennsku og hafi ekki stórar áhyggjur af peningamálum þar sem hann hefur þénað nokkuð vel á ferli sínum. Á þeim forsendum átti hann að koma til þeirra Keflvíkinga.
